«Арсенал» «МЮ» билан отишмада устун келди ва АПЛда биринчи ўринни мустаҳкамлади. Эдди Нкетия — «Эмирейтс»даги учрашув қаҳрамони.
«Арсенал» — «Манчестер Юнайтед» 3:2
Голлар: Нкетиа (24, 90), Сака (53) — Рэшфорд (17), Мартинес (59).
Арсенал – Рэмсдейл, Уайт (Томиясу, 46), Габриэл, Салиба, Зинченко, Чака, Парти, Эдегор (Ҳолдинг, 90+3), Сака, Нкетиа, Мартинелли (Троссар, 82).
Манчестер Юнайтед – Де Хеа, Уан-Биссака, Варан (Гарначо, 90+2), Мартинес, Шоу, Эриксен, Фернандеш, Мактоминей, Вегҳорст, Рэшфорд, Антони (Фред, 71).
Огоҳлантиришлар: Уайт (19), Антони (47), Шоу (83).
Энг яхши даврларни эслатиб
Аср бошида «Арсенал» ва «Манчестер Юнайтед» қарама-қаршилиги жаҳон футболидаги асосий тўқнашувлардан бири эди. Анри ва Руни, Виейра ва Скоулз, Адамс ва Гиггз, Венгер ва Фергюсон — бу номларнинг барчаси тарихда ўз изини қолдирди. Футбол мухлислари ўтмиш билан яшашни ёқтиришмайди, аммо «Арсенал» ва «МЮ» ихлосмандлари сўнгги йилларда айнан шундай яшашга мажбур бўлишмоқда.
Икки гранд ҳам анчадан буён Англия чемпиони бўлмади, бу эса ғолиб бўлишга одатланган клублар учун оғриқли. Аммо бу мавсумда уларда умид пайдо бўлди: бу айниқса «Арсенал»да имкон доирасидаги ишга айланди.
Навбатдаги ўзаро учрашувга икки жамоа ҳам жуда яхши формада етиб келди. Иккинчи давра бошлангач, икки жамоа ҳам бир мартадан дуранг ўйнади, қолган учрашувларда эса ғалаба қозонди. Ижтимоий тармоқларда Артетани Венгер билан, тен Хагни эса Фергюсон билан тенглаштира бошлашди, ҳолбуки бу икки мутахассис ҳам истеъфо ёқасида қолганига у қадар кўп бўлмади. Айниқса тен Хагни мавсум стартидаги муваффақиятсизликлар учун ишдан бўшатишни жуда хоҳлашганди. Аммо нидерландиялик мутахассис вазиятни ўнглади ва биринчи даврада «Арсенал» ягона мағлубиятни айнан шу жамоадан қабул қилиб олди.
Пассив «Юнайтед»
«Эмирейтс»да «МЮ»дан ҳам сифатли ўйин кутиш мумкин эди, бироқ бунинг шартлари бор эди: Каземиро «Кристал Пелас» билан ўйинда ортиқча сариқ карточка олиб, дисквалифицияга учрагач, жамоа майдон марказини «Арсенал»га топшириб қўйиши ва катта қийинчиликларга учраши тахмин қилинди. Умуман олганда шундай ҳам бўлди. «МЮ» биринчи бўлимда тўпга эгалик қилиш бўйича рақиб билан тенгма-тенг кўрсаткич қайд этган бўлса ҳам, жамоага конструктив позицион ҳужумлар етишмади. «Арсенал» эса доимий равишда шошилиб ўйнади ва оддий вазиятларда тўпни рақибга бериб қўйди, натижада ўйин тенг кечаётгани тўғрисида иллюзия пайдо бўлди. Аслида эса меҳмонларнинг тўпга эгалик қилиш кўрсаткичи стерил (самарасиз) эди.
«Юнайтед» биринчи бўлиб гол урди — қишда ёрқин ўйин кўрсатаётган Рэшфорд бу ўйинда ҳам номини таблога ёздириб қўйди ва голли сериясини 9 ўйинга етказди. Ўйиннинг биринчи ярим соати ўтиб бораётганида, ҳисоб 1:1 эканида, Мактоминей узоқдан зарба йўллади — Рэмсдейл тўпни қайтарди. Биринчи бўлимда «МЮ»да бори шу бўлди — фақат икки зарба йўлланди (зарбалар сони бўйича 2:11) ва бошқа хавфли вазиятлар ҳам яратилмади.
«Арсенал» футболчилари эса тиришқоқ эди, аммо шошқалоқ ҳам. Лондонликлар шу туфайли гол ўтказиб юборишганди: Парти ҳимоядан ҳужумга ўтишда шошилиб тўпни йўқотди. Шунга қарамай, «Арсенал» тезда ҳисобни тенглаштирди: Нкетиа Чаканинг қанотдан узатмасини бош билан дарвоза тўрига жойлаб қўйди.
Ҳақиқий триллер
Артета катта эҳтимол билан танаффусда жамоадан хотиржам бўлишни ва тезликни меъёрида сақлашни сўраган. Иккинчи бўлим бошида «Арсенал» ҳужумларидан тартибсизлик йўқолди ва бу иккинчи голга олиб келди. Бу ҳолатда Артета ҳам рақибнинг оғриқли нуқтасидан фойдаланди: «Юнайтед» бутун чизиқ бўйлаб ҳимояланмади, қанот ҳимоячилари прессингда жуда суст ҳаракатланишди. Биринчи бўлимда Де Хеа дарвозасига гол чап қанотдан келганди, иккинчиси — ўнгдан: Сака ўз услубида чап оёқда аниқ зарба йўллади.
Аммо ҳозирги «Арсенал»да ожиз нуқталар бор ва бу тен Хагга маълум. «Тоттенҳэм» билан дербида ҳам ҳисоб 2:0 кўринишига келгач, «канонирлар» ҳимояда ўйнашга қарор қилган ва якунда барибир уч очкони сақлаб қолишганди. Бу сафар ҳам шундай бўлди, аммо ҳисоб 2:1 эди. «Юнайтед» олдинда эркинликка эришди, босимни кучайтирди ва бурчакдан тўп узатилган вазиятда ҳисобни тенглаштирди. Бу стандарт вазиятда «Арсенал» футболчиларига саволлар бор: Рэмсдейл тўпга чиқишда ёмон ҳаракатланди, ҳимоячилар эса жарима майдони марказида 175 сантиметр бўйга эга Мартинесни ёпишмади ва аргентиналик ҳимоячи бош билан гол уришига қўйиб беришди.
«Арсенал» ўйинда учинчи бор барчасини бошидан бошлашига тўғри келди. Ўйин охирига бориб футболчилар толиқишганди, шу туфайли яна олдинга бориш қийин эди. Шунга қарамай вазиятлар бўлди — жумладан, Сака эгизак гол уришга яқин келди, аммо унинг зарбаси аввал ҳимоячига, кейин устунга тегди.
Бироз тин олиб, «Арсенал» яна ҳужумга ўтди, бунда жамоага янги футболчи Троссар ҳам ёрдам берди. Аммо лондонликларга муваффақиятни янги харид қилинган футболчи эмас, академия тарбияланувчиси, доимий равишда танқид қилинадиган ҳужумчи келтирди. Нкетиа бу ўйинда ҳам аввалига жуда қулай вазиятдан фойдалана олмади, 84-дақиқада у бир неча метрдан туриб, ҳимоячилар қаршилигига учрамаган ҳолда зарба берди, аммо тўп тўғри Де Хеага борди. Аммо асосий вақт охирида форвард дублни расмийлаштириб, жамоага жуда муҳим ғалаба келтирди ва ўзини оқлади.
«Арсенал» оғир кечган учрашувда ғалаба қозониб, турнир жадвали юқорисидаги ўрнини мустаҳкамлади. Энди захирада бир ўйин борлиги ҳолда асосий таъқибчи «Манчестер Сити» билан орадаги фарқ 5 очкони ташкил этмоқда, «Юнайтед» эса етакчидан 11 очко ортда қолиб кетган ва тўртинчи ўринда жойлашган. Лондонликлар учун чемпионлик янада реаллашди — Артета шогирдлари чиндан ҳам узоқ кутилган триумфга яқин.
Англия: Шанба кунги қуруқ ўйинлар ва жиловланмаган Ҳолланд
«Ливерпул» – «Челси» – 0:0
«Ливерпул»: Алиссон, Гомес, Конате, Робертсон, Байчетич, Тиаго Алкантара, Кейта (Нуньес, 65), Милнер (Александр-Арнольд, 72), Эллиотт, Салоҳ, Гакпо.
«Челси»: Аррисабалага, Чалоба, Тиаго Силва, Бадяшил, Кукурелья, Жоржиньо, Зиеш, Маунт, Галлаҳер, Ҳолл (Мудрик, 55), Ҳавертц.
«Ливерпул» ва «Челси»нинг жорий мавсумда кўрсатаётган натижалари ушбу ўйин афишасини тушириб юборди. Аммо мавсум омадсизлари бу ўйин арафасида мухлисларини хурсанд қилиб, ўз кайфиятини ҳам кўтариб олганди. Қизиллар «Вулверҳэмптон» билан такрорий ўйинда ғалаба қозониб, Англия кубогидаги иштирокини давом эттирди, лондонликлар эса чемпионат доирасида «Кристал Пэлас»га қарши ўйинда йил бошидан буён илк ғалабасига эришди.
Ўзаро ўйинни эса «Челси» кучли бошлади, аммо бурчак зарбасидан кейин урилган гол ҳисобга олинмади, чунки бу вазиятда тўпни дарвоза устунига теккизган Тиагу Силва ҳам, қайтган тўпга зарба берган Ҳаверц ҳам офсайдда қолишганди. Яна бир стандарт вазиятда Бадиашил хавфли зарба берганида Алиссон нафақат турнинг, балки бутун мавсум ҳит-парадларидан ўрин эгаллайдиган сэйв ижро этди.
«Ливерпул» эса фақат танаффус арафасида уйғона бошлади. Салоҳ фаоллик қилди, аммо зарбаларда аниқлик етишмади. Аммо мезбонларнинг ҳужумлари «Челси»нинг майдонда Мудрик пайдо бўлгандан кейинги ҳужумлари каби хавфли бўлмади, украиналик иқтидор соҳиби жарима майдони ичида икки рақибни ортда қолдириб, зарба берди, аммо тўп дарвоза тўрига ташқи томондан тегди. У яна икки ҳолатда тўпни жарима майдонига олиб кириб, шерикларини қулай вазиятга чиқарди, аммо шериклар бу вазиятлардан фойдалана олмади. Мерсисайдликлар сафида Гакпода ҳам қулай вазият бўлди, аммо Кепа қутқарди.
Ливерпулликлар мудофаасининг ўнг қанотида ўйнаган Милнер кўкларнинг янги футболчисига бардош бера олмади ва унга фол ишлатиб, сариқ карточка олди, яна бир вазиятда узоқ устун олдида ўзи қўриқлаши керак бўлган ушбу футболчини бўш қолдирди. Натижада Юрген Клопп унинг ўрнига майдонга ҳамиша ҳам ишончли ўйнамаса ҳам, тезкор бўлган Александр-Арнолдни туширишга қарор қилди. Шундан кейин ўйин анча хотиржамлашди, ҳимоячининг рақиб жарима майдонида йўллаган зарбаси юқорироқдан кетмаганида мураббийнинг бу қарори ўзини тўла оқлаган бўларди. Аммо ўйинда ҳисоб очилмай қолди ва Клопп ўз фаолиятидаги 1000-ўйинида дуранг билан қаноатланишга мажбур бўлди, бу натижа эса уни ҳам, Грэм Поттерни ҳам қониқтирмайди. Қолаверса, бу ўйинда «Челси»нинг асосий таркиб футболчиларидан бири Чалоба ҳам сафдан чиқди.
«Кристал Пэлас» — «Ньюкасл» 0:0
«Кристал Пэлас» – Гуаита, Уорд (Клайн, 71), Гейи, Ричардс, Митчелл, Шлупп (Ҳьюз, 65), Эзе (Олисе, 65), Дукуре, Айю, Заа (Матета, 65), Эдуар (Озо, 90).
«Ньюкасл» – Поуп, Триппьер, Шер, Ботман, Берн, Бруно Гимараэс, Лонгстафф, Уиллок (Сен-Максимен, 69), Альмирон (Мерфи, 86), Уилсон (Исак, 69), Жоэлинтон.
Огоҳлантиришлар: Гейи (4), Триппьер (57), Ҳьюз (75), Дукуре (87), Олисе (90+4), Жоэлинтон (90+4).
«Ливерпул» ва «Челси» «Ньюкасл»га ҳавас қилишга мажбур бўлган ўринларда қолмоқда. Аммо шу куни «қарғалар» ҳам ўз мухлисларини голлар билан хушнуд эта олмади. Айтиш керакки, сўнгги вақтларда жамоа учун гол уриш муаммога айланган. Эдди Ҳау қурган мудофаа чизиғи — АПЛда энг яхшиси (жамоа энг кам гол ўтказган), аммо футболчилар гол уришда қийналишмоқда. 31 декабрдан буён «Ньюкасл» чемпионатда тўрт ўйин ўтказди, шундан учтасида голсиз дуранг қайд этилди. Албатта, бу давр оралиғида «Арсенал» ҳужумчилари тўхтатиб қолингани билан фахрланиш мумкин, аммо ўтган турда Исак сўнгги дақиқаларда «Фулҳэм»га гол урмаганида барчаси қайғули кечиши мумкин эди. Бошқа томондан барибир бешинчи ўриндаги «Тоттенҳэм»дан ўзиб кетилди. Қолаверса, «Кристал Пэлас» ҳам оддий рақиб эмас — уч кун муқаддам бу жамоа «МЮ»нинг ғалабали сериясини тўхтатганди.
«Манчестер Сити» — «Вулверҳэмптон» 3:0
Голлар: Ҳоланд (40, 49, 54).
«Манчестер Сити» – Эдерсон, Стоунз, Лапорт, Аканжи, Льюис (Аке, 46), Гундўған, де Брюйне (Силва, 77), Грилиш, Родри (Филлипс, 77), Маҳрез (Палмер, 81), Ҳоланд (Альварес, 61).
«Вулверҳэмптон» – Са, Семеду, Коллинз, Килмен, Буэно (Аит-Нури, 81), Лемина (Поденсе, 67), Невеш, Нунеш, Хименес (Кунья, 46), Траоре (Сарабия, 46), Ҳван Ҳи Чҳан (Моутиньо, 46).
Огоҳлантиришлар: Килмен (10), Лемина (13), Родри (25).
Ўзига хос бўлмаган «қуруқ» ўйинлардан кейин Эрлинг Ҳоланд кучли ҳафта ўтказди. Пайшанба куни у «Тоттенҳэм»га қарши ўйинда камбэкни таъминлаган ҳал қилувчи голлардан бирини урганди. Якшанба куни эса «Вулверҳэмптон» учун ҳақиқий даҳшатга айланди, бу рақиб унга қарши ҳеч нарса қила олмагани етмасдан, совға ҳам тайёрлаганди. Гап меҳмонлар посбони, тўпни Маҳрезнинг оёқларига ташлаб берган Жозе Са ҳақида кетмоқда, шундан кейин жазоирлик футболчи Ҳоландни бўш бурчак қаршисига чиқариб юборди.
Шу тариқа Эрлинг АПЛдаги тўртинчи ҳет-тригини расмийлаштирди — ва турнирда навбатдаги рекорд янгиланди. Бу натижага барчадан эрта — 65 ўйинда — Рууд ван Нистелрой эришганди. Ҳоланд учун эса 19 ўйин етарли бўлди, агар у суръатни пасайтирмаса, Алан Ширер ҳам тарихий ютуғи билан хайрлашишига тўғри келади. Афсонавий форвард 1995/96 йилги мавсумда бир чемпионат доирасида беш бор ҳет-трик қайд этганди.
Ҳоланднинг ютуқларига фақат Маҳрез эмас, Де Брюйне ҳам ҳаммуаллиф ҳисобланади. Бельгиялик футболчи бу мавсумда барча турнирлар доирасида 16 та голли узатма муаллифи бўлиб улгурди (шундан 7 таси — норвегиялик ҳужумчига узатилган). Бу топ-5 лигалардаги энг яхши кўрсаткич.
Испания: басклар рақобат кўрсатмоқда, Бензема Раул билан тенглашди
«Райо Вальекано» — «Реал Сосьедад» 0:2
Голлар: Сёрлот (15), Барренечеа (36).
«Реал Сосьедад» – Ремиро, Элустондо, Ле Норман, Субельдия, Рико, Мендес (Мартин, 65), Марин (Фернандес, 81), Сильва (Оласагасти, 65), Ильярраменди, Сёрлот (Ойарсабаль, 65), Барренечеа (Наварро, 70).
Шанба куни Испанияда жамоаларнинг Чемпионлар лигаси йўлланмаси учун пойгасини «Реал Сосьедад» очиб берди ва басклар ўзи қилиши керак бўлган ишни қилди. Биринчидан, очколар сони бўйича Мадриднинг «Реал» клуби билан тенглашди, иккинчидан, ўз таъқибчилари билан масофани сақлаб қолди. Бунда норвегиялик форвард Сёрлотнинг ўйинини алоҳида қайд этиш керак, у қаторасига бешинчи ўйинда гол урди. Сан-Себастьян жамоасининг ғалабали серияси ҳам шунча ўйиндан иборат.
«Атлетико» — «Вальядолид» 3:0
Голлар: Мората (18), Гризманн (23), Эрмосо (28).
«Атлетико» – Облак, Молина, Витцель, Эрмосо, Рейнилду, Коке (Сауль, 75), Лемар (Кондогбиа, 59), Льоренте (Де Поль, 56), Корреа, Мората (Депай, 75), Гризманн (Карраско, 56).
Огоҳлантиришлар: Рейнилду (36), Кике Перес (38).
«Атлетико» учун «Реал Сосьедад»ни таъқиб қилиш — иккинчи даражали вазифа. Муҳими тўртинчи ўринда мустаҳкам жойлашиш ҳисобланади ва «матрасчилар»нинг вазифасини Испания Кубогини тарк этиш ортидан тур ўйинида «Эспаньол»га ютқазган «Бетис» осонлаштирди. Мадридликлар ўз ишини қилиши кифоя эди ва улар буни уддалашди, биринчи бўлим ўрталарига келиб лигада қолиш учун курашувчи рақиб дарвозасига уч гол йўлланди. Диего Симеоне жамоаси ла лигада ўйинни 2017 йилдан буён бу қадар кучли бошламаганди.
Мората муаллифлигидаги биринчи гол кўп жиҳатдан қадрлидир. Биринчидан, эстетлар Гризманнинг товонда берган пасидан ҳам, ҳимоячи ва дарвозабонни йўлдан олиб, дарвозани ишғол этган гол муаллифининг ижросидан ҳам роҳатлангани аниқ. Иккинчидан, Мората ла лига ўйинларида рақиблар дарвозаларига урган голлари сонини 50 тага етказиб, юбилейини нишонлади, эътиборли жиҳати, у бу голларнинг тенг ярмини «Атлетико», қолган ярмини «Реал» сафида урган.
Ўйин масаласи ҳал бўлгач, қизил-оқлар мухлислари Депайнинг дебютини кута бошлашди, Симеоне эса жамоанинг янги аъзосига кўп вақт бермай, уни фақат 75-дақиқада майдонга туширди. Шу вақт ҳам намунали гол учун етарли бўлиши мумкин эди, аммо дарвозабонни алдаб ўтган нидерландиялик футболчига унинг ортидаги ҳимоячи тўсқинлик қилди.
«Вильярреал» — «Жирона» 1:0
Гол: Парехо (90+11, пенальти).
Аниқ ижро этилмаган пенальти: Жерар Морено (90+3).
«Вильярреал» – Рейна, Манди, Пау Торрес, Куэнка (Фалль, 61), Мохика (Альберто Морено, 86), Капу (Тригерос, 81), Парехо, Алекс Баэна, Чуквуэзе (Колладо, 86), Пино (Моралес, 81), Жерар Морено.
Огоҳлантиришлар: Буэно (3), Жерар Морено (18), Пино (25), Мигель Гутьеррес (32), Пау Торрес (37), Стуани (40), Алекс Баэна (45+1), Альберто Морено (90+6), Хуанпе (90+9).
Четлатиш: Буэно (78).
«Вильярреал» ЕЧЛ йўлланмаси учун кураш олиб бораётган гуруҳ вакиллари ўйинларини якунлаб берди ва қўшимча дақиқаларда натижага эришди. Жамоа ўйин давомида «Жирона»дан устунлик қилди, қолаверса «сариқ субмариналар» 78-дақиқада Буэно четлатилгач, бир киши кўп бўлиб ўйнай бошлади.
Лекин қўшимча дақиқалар бошланганида ақл бовар қилмас ҳодиса рўй берди: Жерар Морено шу куни феноменал ўйин кўрсатган Гассаниге билан дуэлни бой бериб, пенальтидан гол ура олмади. Аммо бу барчаси эмасди ва мезбонлар яна бир 11-метрли жарима зарбаси ишлашди, уни эса Дани Парехо аниқ ижро этди. Сюжет бўйича уникал бўлган драма секундомерда 100:01 рақамлари ёнган вақтда якунланди. Бу ғалаба эвазига Кике Сетьен шогирдлари тўпланган очколар сони бўйича «Атлетико» билан тенглашиб олди.
«Барселона» — «Хетафе» 1:0
Гол: Педри (35).
«Барселона» – тер Стеген, Сержи Роберто (Алонсо, 77), Кристенсен (Эрик Гарсия, 46), Кунде, Бальде (Альба, 46), Бускетс, Педри, Гави, Дембеле, Рафинья (Кессиэ, 62), Фати.
«Хетафе» – Сория, Суарес, Жене, Дуарте, Альдерете, Иглесиас (Альварес, 84), Аленья, Милья (Сеоане, 84), Альгобия (Вильяр, 62), Майораль (Порту, 77), Унал (Латаса, 84).
Огоҳлантиришлар: Альдерете (44), Дембеле (68), Унал (82).
«Камп Ноу»даги ўйиннинг энг яққол натижаси — «Барселона» 17 турда тўплаган 44 очко. Буни чемпионлик графиги дейиш мумкин, чунки бу — жамоанинг 2017/18 йиллар мавсумидан буён энг яхши натижаси, ўшанда кўк-анорранглиларнинг ҳозирча энг сўнгги чемпионлиги қайд этилганди. Суперкубок учун баҳсда «Реал» дарвозасини ҳам ишғол этган Педри қаторасига иккинчи ўйинда гол урди ва «Хетафе» устидан ғалабани ҳам таъминлади, бу эса Левандовски йўқлигида жуда муҳимдир. Поляк ҳужумчининг уч ўйиндан иборат дисквалификацияси якунланди ва кейинги турда у ла лига ўйинларига қайтади.
«Атлетик» — «Реал» 0:2
Голлар: Бензема (24), Кроос (90).
«Атлетик» – Унаи Симон, Де Маркос (Лекуэ, 76), Вивиан, Паредес, Берчич, Весга (Рауль Гарсия, 86), Сансет (Муниаин, 67), Саррага (Эррера, 67), Н.Уильямс, Беренгер (Гурусета, 67), И.Уильямс.
«Реал» – Куртуа, Начо, Рюдигер, Милитао, Менди, Себальос (Кроос, 85), Вальверде, Камавинга, Бензема, Асенсио (Модрич, 73), Винисиус (Родриго, 83).
Огоҳлантиришлар: Берчич (50), Вивиан (58), Камавинга (62), Винисиус (79), Эррера (88).
«Реал» эса ўзининг азалий рақиби бўшашишига йўл қўймади ва кичик инқирозни енгиб ўтди. Мадридликлар навбатдаги тур ўйинида жуда кучли ўйин кўрсатмади ва тўпга эгалик қилиш бўйича катта устунликка эришмади, лекин барча билиб турарди: Карло Анчелотти жамоаси учун бу талаб этилмасди. Чоршанба куни Испания Кубоги доирасида «Вильярреал»га қарши ўйин ҳам шундай кечганди, ўшанда чемпионлар танаффусга қадар икки тўп фарқи билан ортда бора туриб, ўйинда бурилиш ясай олишганди.
«Атлетик» гол ура олмаса ҳам, биринчи бўлимнинг катта қисмида рақибга нисбатан фаолроқ ўйнади. Кейин эса Бензема катта саҳнага чиқиб, ла лигадаги 228-голини урди. Бу орқали Мадриднинг бошқа афсонаси — Раулнинг натижаси такрорланди. Табиийки, энди олдинда фақат Криштиану Роналду (311). Ўйин охирида Куртуа дарвозасини кучли штурм қилган мезбонларни Крооснинг голи тинчлантирди, захирадан ўйинга қўшилган у ва Модричга чоракфиналда «Атлетико»га қарши ўйин учун дам олиш имкони берилганди.
Италия: Дибала «Рома»ни Чемпионлар лигаси сари етакламоқда
«Специя» — «Рома» 0:2
Голлар: Ал-Шаъровий (45), Абраҳам (49).
Специя – Дронговски, Хольм (Феррер, 13), Кальдара, Амьян, Христов (Эспозито, 46), Ампаду, Реца (Браганса Моутинью, 79), Бурабия (Коваленко, 55), Агудело, Жаси, Верде (Мальдини, 46).
Рома – Патрисиу, Челик, Смоллинг, Манчини, Рожер, Матич, Кристанте (Камара, 90+3), Ал-Шаъровий (Бове, 71), Дибала (Белотти, 85), Абраҳам (Сольбаккен, 90+3), Залевски.
Огоҳлантиришлар: Бурабия (36), Кальдара (40), Реца (58), Челик (88).
Турнир жадвали қуйи қисмидан чиқиш учун қаҳрамона операция бошлаган ва қаторасига беш турда мағлуб бўлмаган «Специя» Дибалани тўхтата олмади. Аргентиналик футболчи ўз даражасини кўрсатмоқда, у жароҳатидан тузалибоқ «Рома»нинг натижаларини яхшилай бошлади. Мавсум бошидан буён у жами 13 ўйинда майдонга тушди (барчасида ҳам бошланғич таркибда эмас) ва 10 та самарали балл ишлади. 7 бор у ўзи гол урган ва уч марта шерикларини пас билан таъминлаган.
Якшанба кунги ўйинда Дибала яна натижа келтирди - биринчи бўлим охирида ва иккинчи бўлим бошида икки голни ташкиллаштирди. Биринчи вазиятда у ўзи гол уриши мумкин эди, аммо янада нозикроқ ўйнашга қарор қилиб, тўпни бўш дарвоза қаршисига чиқиб келган Ал-Шаъровийга ташлаб берди. Иккинчи вазиятда — майдон марказида рақибнинг узатмасини эгаллаб олиб, сўнгги ҳимоячи билан яккама-якка ҳолатда қолган Абраҳамни олдинга ташлади. Энди «Рома» кучли тўртликда, бунда «Ювентус» билан боғлиқ можаронинг ҳам ҳиссаси бор.
«Ювентус» — «Аталанта» 3:3
Голлар: Ди Мария (25, пенальти), Милик (34), Данило (65) — Лукман (4, 53), Мэле (46).
«Ювентус» – Шченсни, Сандро, Данило, Бремер, Маккенни, Костич (Кьеза, 61), Ди Мария (Миретти, 74), Рабьо, Локателли, Фажоли (Куадрадо, 81), Милик (Кен, 74).
«Аталанта» – Муссо, Ҳатебур, Паломино (Демирал, 15), Толои, Скальвини, Мэле (Ружери, 84), де Рон, Эдерсон (Жимшити, 83), Бога (Пашалич, 66), Лукман, Ҳейлунд (Муриэль, 83).
Огоҳлантиришлар: Эдерсон (49), Кьеза (90+2), Ҳатебур (90+2).
«Ювентус» 15 очкодан маҳрум этилгач, жамоа футболчилари ва мураббийлар штаби ҳолатини тасаввур қилиш қийин. Туринликлар бу қарор натижасида 10-ўринга тушиб кетди ва Массимилиано Аллегрининг барча меҳнатлари ҳавога учди. Лекин мураббий ўйин арафасида сўзларни тўғри танлай олди.
«Эртага муҳим ўйин. Айниқса кеча бўлган ишдан кейин бу янада муҳим. Биз янада кўпроқ жипслашишимиз ва ишлашда давом этишимиз керак. Биз, ходимлар ва футболчилар шунчаки ўйин ҳақида ўйлашимиз керак. Жарима билан боғлиқ ҳеч нарса ўзгармайди: биз одатдагидек очко жамғариш учун ўйнашимиз керак», деди мураббий.
Аммо «Юве» атрофидаги воқеалар барибир футболчиларга таъсир кўрсатган ва ўйинни кучайтира бошлаган «Аталанта» билан ўйинда «бьянконери» ҳисобда қувувчи жамоа ролини бажарди. Лукман ўнинчи голини уриб, Жан Пьеро Гасперини жамоасида янги футболчилар одатга хилоф равишда тезда жамоага қўшилиб кетиши ҳам мумкинлигини исботламоқда. Англиялик футболчи бергамоликлар сафида ўтган асрнинг 50-йилларидан буён кузатилмаган тезкорлик намойиш этди.
Аммо «Ювентус»ни шунинг ўзи билан нокаутга учратиш қийин. Неаполдаги йирик мағлубият — алоҳида тарих, бу сафарги ўйинда эса «Аталанта» танаффусга мағлуб мақомида йўл олди. Ўйинда Локателлининг яккахон юриши бурилиш ясашни бошлади, бу ҳужум пенальтига олиб келди. Бу жарима зарбасини аниқ ижро этган Ди Мария кейинги ҳужумда товони билан Фаджолига пас берди, у эса Миликнинг гол уришини таъминлади. Шундан сўнг туринликлар барчасини ўз қўлига олиши кутилганди, аммо бу ўйинда эйфория эстафета таёқчасидек алмашди.
Лукман ҳам танаффуслар билан ўзини кўрсатишда давом этди. Иккинчи бўлим бошланиши билан меҳмонларнинг ёрқин футболчиси Мелени голли пас билан таъминлади. Кейин эса қанотдан узатилган тўпни боши билан дарвоза тўрига йўллаб, жамоасини яна олдинга бошлади. Аммо Ди Мария яна товони билан берилган пас орқали диққат марказида бўлди. Барча у жарима нуқтасидан тўпни дарвозага йўллашини кутганида, Анхель рақибни доғда қолдириб, тўпни Данилуга ташлаб берди, у эса дарвозанинг пастки бурчагини аниқ нишонга олди. Ақл бовар қилмас ўйин — ва кўп жиҳатдан «Юве» ҳали тириклигини кўрсатувчи натижа.
Германия: Аллер триллер ўйинда қайтди
«Боруссия» Д — «Аугсбург» 4:3
Голлар: Беллингем (29), Шлоттербек (42), Байно-Гиттенс (75), Рейна (78) — Майер (40), Демирович (45+1), Чолина (77).
Боруссия Д – Кобель, Рюэрсон, Ҳуммельс, Шлоттербек, Геррейру, Брандт (Зюле, 90+1), Ўзжан, Беллингем, Мален (Байно-Гиттенс, 70), Адейеми (Рейна, 70), Мукоко (Аллер, 62).
Аугсбург – Гикевич, Гумни, Гауэлеу, Удуохай, Педерсен, Майер (Баумгартлингер, 76), Варгас (Кардона, 12; Йенсен, 65), Режбечай (Чолина, 76), Энгельс, Демирович, Бельо (Йебоа, 76).
Огоҳлантиришлар: Педерсен (45), Кардона (54), Йенсен (69), Беллингем (84), Энгельс (90+2).
Ўйин арафасида «Боруссия» майдон ташқарисида ўзига хос ғалабага эришган, ўз вундеркинди Мукоко билан шартномани барибир янгилаганди. «Аугсбург» билан ўйинда эса «Сигнал Идуна Парк» трибуналарига йиғилган мухлислар ақл бовар қилмас ўйин гувоҳига айланишди. Лекин голли отишма ёш форвард иштирокисиз кечди — иккинчи бўлим давомида унинг ўрнига онкологик касалликдан даволаниш курсини ўтаган Аллер туширилди.
Турнир жадвали қуйи қисмида қолаётган «Аугсбург» еврокубоклар зонасидаги «асаларилар» билан ҳисобда қувлашмачоқ ўйнади. Дортмундликларнинг уч голига ҳар сафар дарҳол жавоб қайтарилди, ўйиннинг энг қизғин паллалари эса иккинчи бўлимдаги уч дақиқалик бўлди, унда дастлаб майдонга тушганига 34 сония бўлган Чолина ўйинда учинчи бор мувозанатни тиклади, аммо бир лаҳза ўтиб мезбонлар жокери Рейна «Боруссия»га ғалаба келтирган голни урди. Бу кеча дортмундликлар ғалабани қўлдан чиқариши ҳам мумкин эди, аммо ҳакамнинг ўйин якунлангани ҳақидаги ҳуштаги чалиниши арафасида Демирович яккама-якка вазиятга чиқиб бориб, тўпни дарвоза тўсини юқорисидан ўтказиб юборди.
Кун статистикаси
- Белгия чемпионатида «Брюгге» ҳимоячиси Мехеле сўнгги уч ўйинда 2 автогол муаллифи бўлди.
- Яримҳимоячи Сака «Арсенал»нинг «МЮ»га қаторасига уч ўйинда гол урган учинчи футболчиси бўлди, бунгача бу ишни Фредди Юнгберг ва Тьерри Анри уддалаган.
- «Сампдория» қаторасига 6 уй ўйинида гол ура олмаяпти. Бу генуяликларнинг Италия чемпионатида 1976 йилдан буён энг ёмон серияси.
- «Ювентус» А Серияда 1988 йилдан буён илк бор кетма-кет икки ўйинда 8 гол ўтказди.
- «Фейеноорд»га қарши ўйинда биринчи бўлиб гол ўтказиб юборганига қарамай, «Аякс» ҳисобни тенглаштирди ва мағлубиятсиз сериясини 8 ўйинга етказди (+4=4).
- Германия чемпионатининг 17-турида 41 гол урилди. Бу 2001/02 йиллар мавсумининг сўнгги туридан буён энг голларга бой ўйин куни бўлди, 21 йил олдин дарвозаларга 44 гол урилганди.
- «Эвертон» 20 турда 15 очко тўплаган. Бу клубнинг Англия футболида уч очколик тизимга ўтилганидан буён энг ёмон натижасидир.
