Вейк-ан-Зее шаҳрида ўтаётган турнирнинг «Masters» гуруҳида ўзбекистонлик халқаро гроссмейстер Нодирбек Абдусатторов ҳиндистонлик Аржун Эригаисини қора доналарда мағлуб этишга эришди. Ушбу ғалаба орқали Нодирбек очколари сонини 5,5 тага етказиб, гуруҳда якка пешқадамга айланиб олди.
🚨 ABDUSATTOROV sigue haciendo MARAVILLAS.
— Chess.com en Español (@chesscom_es) January 21, 2023
El líder del torneo cada día MÁS líder. 5.5/8 y una subido de +18. Una de las apuestas más fuertes de una nueva generación de ajedrecistas se está consagrando en el Tata Steel. pic.twitter.com/IDvu1Y3K99
Абдусатторов турнир давомида венгриялик Рихард Раппорт, эронлик Парҳам Мақсудлуни мағлуб этиб, америкалик Фабиано Каруана ва ҳиндистонлик Доммаржу Гукеш билан дуранг ўйнаган эди. Икки кун аввал эса Магнус Карлсен устидан муҳим ғалабага эришган, куни кеча ҳиндистонлик Рамешбабу Прагнанандаа билан дуранг қайд этганди.
Бугун Нодирбек Абдусатторов оқ доналарда Левон Аронян билан куч синашади.
«Masters» гуруҳида яна 6 та тур ўтказилади. Турнир 29 январгача давом этади.
Ўзбекистонлик яна бир халқаро гроссмейстер Жавоҳир Синдоров эса «Challengers» гуруҳида ғолиблик учун кураш олиб боряпти. У 7-турда нидерландиялик Элин Роеберсга қарши учрашувни оқ доналарда ўтказиб, ғалабага эришди.
Шу тариқа, Жавоҳирнинг очколари сони 5 тага етди ва у энди иккинчи ўринда бормоқда.
Бугун у турнирдаги жуда муҳим ўйинни ўтказади. У қора доналарда 3-ўринда бораётган турк гроссмейстери Мустафо Йилмазга қарши дона суради.
