Deputatlar «2023 yil uchun Davlat budjeti to‘g‘risida»gi qonunni qayta ko‘rib chiqadimi? 

Iqtisodiyot 11:27 / 25.12.2022 32085

22 dekabr kuni Oliy Majlis Qonunchilik palatasi yig‘ilishida «2023 yil uchun O‘zbekiston Respublikasining Davlat budjeti to‘g‘risida»gi qonuni loyihasi ikkinchi va uchinchi o‘qishdan keyin qabul qilingandi. Ammo, shundan so‘ng «Yangi O‘zbekiston ma’muriy islohotlarini amalga oshirish chora-tadbirlari to‘g‘risida»gi prezident farmoni imzolandi. Farmonda ijro etuvchi hokimiyat organlarining sonini 61 tadan 28 tagacha, shu jumladan vazirliklar sonini 25 tadan 21 tagacha qisqartirish ko‘zda tutilgan. Kun.uz deputat Navro‘z Rizayev bilan bog‘lanib, “Qonunchilik palatasi davlat budjeti haqidagi qonunni qayta ko‘rib chiqadimi?” degan savol bilan yuzlandi.

«Budjet qayta ko‘riladi, shunaqa kelishilgan. Qonun loyihasi Qonunchilik palatasiga qaytarilmaydi, unga o‘zgartirishlar kiritiladi. Moliya vaziri o‘rinbosari Ahadbek Haydarovning bizga ma’lum qilishicha, vazirliklar o‘zgarganidan keyin, mablag‘lar ajratish qayta taqsimotda nazarda tutiladi.

Mening bilishimcha, «Davlat budjeti to‘g‘risida»gi qonun tasdiqlanadi va keyingi yilda mazkur qonunga o‘zgartirish va qo‘shimchalar kiritish masalasi ko‘rib chiqiladi. Taqsimotda hamma jihatlar e’tiborga olinadi», - dedi deputat.

Ma’lumot uchun, 2022 yil 27 dekabr kuni chaqiriladigan Senatning o‘ttiz oltinchi yalpi majlisida «2023 yil uchun O‘zbekiston Respublikasining Davlat budjeti to‘g‘risida»gi qonunni ko‘rib chiqish rejalashtirilgan.

Ko‘proq yangiliklar: