Столтенберг Запорижжя АЭСдаги ядровий фалокат хавфи ҳақида огоҳлантирди

Жаҳон 09:06 / 18.08.2022 3607

НАТО бош котиби Йенс Столтенберг Россия ҳарбий хизматчилари томонидан эгаллаб олинган Запорижжя АЭСда ядровий фалокат юз бериши хавфи ҳақида огоҳлантирди. Шу билан бирга, у Россияни Атом энергияси бўйича халқаро агентлик (АЭХА) мутахассислари томонидан ЗАЭС текширилишига рози бўлишга чақирди.

Украинадаги АЭСнинг Россия қўшинлари томонидан эгаллаб олиниши унинг ишлаши хавфсизлигига жиддий таҳдид солади ва ядровий авария ёки ҳодиса хавфини оширади, бу эса, ўз навбатида, Украина аҳолиси, қўшни давлатлар ва жаҳон ҳамжамиятига хавф туғдиради, деди Столтенберг 17 август, чоршанба куни Брюсселда сўзлаган нутқида. «Шошилинч тарзда Атом энергияси бўйича халқаро агентлик томонидан текширув ўтказилишини таъминлаш ва Россиянинг барча қўшинларини олиб чиқиб кетишни кафолатлаш керак», деди НАТО бош котиби.

Россия қўшинлари март ойи бошида Запорижжя АЭСни эгаллаб олди, шундан сўнг украиналик ходимлар станцияда ишлашда давом этди. Июль ойининг охиридан бери Европадаги энг йирик атом электр станцияси бўлган ЗАЭС мунтазам равишда ўққа тутилмоқда, шунингдек, ОАВда у Россия қўшинлари томонидан миналаб қўйилгани ҳақида маълумотлар пайдо бўлди. АЭХА ҳам ядровий қирғин хавфи ҳақида огоҳлантирган. Бир неча кун олдин халқаро агентлик раҳбари Рафаэл Гросси БМТ Хавфсизлик кенгаши фавқулодда йиғилишида ўз мутахассисларининг электр станциясига зудлик билан киритишни талаб қилган эди.

Украинанинг «Энергоатом» давлат компанияси раҳбари Петр Котиннинг DW’га маълум қилишича, Украина томони ЗАЭСнинг ядровий ва радиацион хавфсизлигини тўлиқ назорат қилмаяпти. Украина президенти Володимир Зеленский Запорижжя АЭС билан боғлиқ вазият туфайли Россия атом саноатига қарши санкциялар қўллашга чақирди. «Бу - фақат хавфсизлик масаласи. Бошқа давлатларга ядровий таҳдид солаётганларнинг ўзи ядро технологияларидан хавфсиз фойдаланишга қодир эмас», деб таъкидлади Зеленский.

Кўпроқ янгиликлар