"Investitsiya loyihalarini amalga oshirishda infratuzilma sharoitlari yetarli emas" - Charm-sanoat sohasi tadbirkorlarining muammolari muhokama qilindi

Mazkur tadbir prezident Shavkat Mirziyoyevning tadbirkorlar bilan o‘tkazilishi rejalashtirilayotgan ochiq muloqoti oldidan tayyorgarlik sifatida tashkil etildi. Tadbirda “O‘zcharmsanoat” uyushmasi tomonidan murojaatlar uchun tashkil qilingan koll-markaz hamda maxsus shtabga charm-poyabzal va mo‘ynachilik sohalaridagi tadbirkorlardan kelib tushayotgan taklif va mulohazalar muhokama qilindi.

Ma’lum qilinishicha, shtabga 1000ga yaqin murojaat va 40ga yaqin taklif kelib tushgan. Ushbu murojaat va takliflarga yechim topish maqsadida 40 ga yaqin vazirlik va idoralar mutasaddilari ham ishtirok etgan uchrashuvda tadbirkorlar ularga bevosita o‘z savollarini berish imkoniyatiga ega bo‘lishdi.

Muhokamalar natijasida sohada yechimini kutayotgan muammolar, eng ko‘p qayd etilgan murojaatlar sifatida quyidagilar ko‘rsatib o‘tildi:

- investitsiya loyihalarini amalga oshirishda infratuzilma sharoitlarini yaratish, yer uchastkalarini auksionga tezkor ravishda qo‘yish hamda xususiylashtirish jarayonlari yetarli darajada yo‘lga qo‘yilmagani;

- to‘lov miqdorlari yuqoriligi;

- mahsulotlarni eksportga jo‘natishda QQSni qaytarish va logistika bilan bog‘liq holatlarga doir tizimli muammolar.

«O‘zcharmsanoat» uyushmasi raisi Faxriddin Boboyevning ta’kidlashicha, muammolarning ayrimlari shu yerning o‘zida hal etildi:

“Ko‘rib chiqilishi muayyan muddat talab qiladigan ayrim muammolar alohida mas’uliyat va vaqt talab qiladi. Shunday muammolar borki, ularga davlat darajasida e’tibor qaratilishi zarur. Shunday murojaatlardan ayrimlarini davlat rahbari va tadbirkorlarning ochiq muloqotidagi masalalar tarkibiga qo‘shish ham ko‘zda tutilgan. Shuning uchun tegishli instansiyalar bilan hamkorlikda ishlayapmiz”, – dedi u.