Тошкентда “UZCHARMEXPO-2022” 12-халқаро кўргазмаси ўз ишини бошлади

Жамият 15:33 / 26.05.2022 5892

Кўргазманинг илк кунида Буюк Британия, Франция, Ҳиндистон, Россия, Германия, Туркия, Испания, Полша, Хитой каби чарм-пойабзал саноати ривожланган мамлакатларнинг брендлари ўз маҳсулотлари намойишини бошлашди. Халқаро кўргазмада қарийб 5 минг нафар иштирокчилар ташриф буюриши кутилмоқда. Уч кун давом этадиган кўргазмада маҳаллий ва хорижий чарм, пойабзал, жун, мўйна маҳсулотлари тақдим этилади ва янги шартномалар имзоланади.

Дунё чарм-пойабзал ва мода саноатида катта аҳамиятга эга бу кўргазма “Ўзчармсаноат” уюшмаси ҳамда Ўзбекистон Республикаси Инвестициялар ва ташқи савдо вазирлиги ҳамкорлигида ташкил этилган.

“UZCHARMEXPO-2022” 12-халқаро кўргазмасида шу соҳада фаолият юритувчи 100га яқин йирик хорижий ишбилармонлар қатнашишди. Улар бу ерда ҳамкорлик алоқаларини янада мустаҳкамлаш мақсадида мамлакатимиздаги ишлаб чиқариш корхоналари фаолияти билан танишишни ҳам ўз ичига олган бизнес-дастур билан ташриф буюришган.

Мазкур кўргазма бир йилда икки маротаба ўтказилади ва ўзаро манфаатли ҳамкорлик, икки томонлама алоқалар ўрнатиш, янги бизнес лойиҳалар тузиш, йирик шартномалар тузиш учун самарали майдон ҳисобланади.

“UZCHARMEXPO-2022” халқаро кўргазмаси нафақат компанияларнинг салоҳияти, маҳсулот ассортименти ва соҳадаги инновациялар билан танишиш имконияти, балки, B2B ва G2B музокаралари учун самарали платформадир.

“UZCHARMEXPO-2022” дастурида маҳаллий дизайнерлар томонидан табиий чармдан яратилган пойабзал, атторлик ва мўйна маҳсулотлари, замонавий либослар дефелеси бўлиб ўтди. Унда истеъдодли дизайнерларнинг чарм маҳсулотларидан тикилган янги коллекциялари намойиш этилди. Кўргазма 26-27 май кунлари ҳам давом этади.

Маълумот ўрнида: “Ўзчармсаноат” уюшмаси чорва молларини сўйиш, терини қайта ишлаш, пойабзал, чарм буюмлар, бутловчи қисмлар ва аксессуарлар, пойабзал саноати учун маҳаллийлаштирилган маҳсулотлар ишлаб чиқарувчи 700дан ортиқ корхоналарни ўз атрофида бирлаштиради. Уюшма чарм-пойабзал саноатида тадбиркорлик қилиш истагидаги корхона ва тадбиркорларга ўз бизнес режаларини ишлаб чиқишда яқиндан кўмак беради.

“Ўзчармсаноат” уюшмаси Матбуот хизмати Ⓣ

Кўпроқ янгиликлар