Shavkat Mirziyoyev 29 aprel kuni o‘tkazilgan videoselektor yig‘ilishida bir qator mahbuslarni avf etish bo‘yicha farmonni imzoladi. Bu haqda prezident matbuot kotibi xabar qildi.

«Ramazon oyi – saxiylik, mehr-oqibat va bag‘rikenglik oyidir. Bu qutlug‘ ayyomda mehr-shafqatli, kechirimli bo‘lish hammamiz uchun ham farz, ham qarz», — degan davlat rahbari.

Shu munosabat bilan, Ramazon hayiti arafasida prezident adashib jinoyatga qo‘l urgan, lekin aybini chuqur anglab, tuzalish yo‘liga qat’iy o‘tgan 65 nafar fuqaroni afv etish bo‘yicha farmonni imzolagan.

Eslatib o‘tamiz, Shavkat Mirziyoyev 2021 yilgi Ramazon hayiti munosabati bilan 100 nafar mahbusni afv etgan edi. 2022 yil yanvar oyi oxirida «Ozodlikdan mahrum etish jazosini o‘tayotgan, qilmishiga chin ko‘ngildan pushaymon bo‘lgan va tuzalish yo‘liga qat’iy o‘tgan bir guruh shaxslarni afv etish to‘g‘risida»gi prezident farmoni imzolangan, unga ko‘ra, 44 nafar mahbus muddatidan avval ozod etilgandi.