AQSh prezidenti Donald Tramp 21 yanvar, seshanba kuni AQShda sun’iy intellekt (SI) infratuzilmasini rivojlantirishga 500 milliard dollargacha (479,6 milliard yevro) sarmoya kiritishni maqsad qilgan Stargate loyihasi ishga tushirilganini e’lon qildi. Loyihani yirik sun’iy intellekt ishlab chiqaruvchisi OpenAI, Yaponiyaning SoftBank konserni hamda dasturiy va texnik vositalar ishlab chiqarishga ixtisoslashgan Amerikaning Oracle kompaniyasi amalga oshiradi. Hamkorlar orasida Microsoft, MGX, Arm va NVIDIA ham bor.

Stargate rahbarlari bilan bir qatorda so‘zga chiqqan Donald Tramp loyiha «deyarli zudlik bilan» 100 000 ish o‘rni yaratishiga va Qo‘shma Shtatlarning «texnologik kelajagi»ni ta’minlashiga va’da berdi. «Ushbu monumental tashabbus Amerikaning yangi prezident davridagi salohiyatiga ishonchning yorqin deklaratsiyasidir», dedi Tramp. Loyiha Texasning Abilin shahrida ma’lumotlar markazi qurilishi bilan boshlanadi.

Avvalroq Oq uyning yangi rahbari o‘zidan oldingi prezident Jo Baydenning sun’iy intellektni tartibga solish haqidagi farmonini bekor qilgandi. Bekor qilingan qoidalarga ko‘ra, OpenAI va Google kabi yirik kompaniyalar xavfsizlik ma’lumotlari va boshqa maxfiy ma’lumotlarni federal organlarga topshirishlari kerak edi. Yirik texnologiya kompaniyalari tashabbusni qo‘llab-quvvatladi, biroq kichikroq SI kompaniyalari – ko‘pchiligi Donald Trampni qo‘llab-quvvatlayapti – bunga qarshi chiqdi.