«Сенатда ишловчи Сайёра Ғозиевна» орқали Бош прокуратурага ишга киритиб қўйишни ваъда қилган фирибгар қўлга олинди

Жамият 11:43 / 20.03.2022 17374

Тошкент шаҳри Янгиҳаёт тумани Green Park боғи олдида Абдураззоқ исмли шахс кимёвий ишлов берилган 18 млн сўм миқдоридаги пулни олаётган вақтида далилий ашёлар билан қўлга олинган.

Маълум бўлишича, 2022 йил 20 февраль куни икки нафар фуқаро Тошкент шаҳар ИИББ бошлиғига ариза билан мурожаат қилиб, Абдураззоқ исмли шахс уларни Олий Мажлис Сенатида ишловчи Сайёра Ғозиевна исм-шарифли таниши орқали Ўзбекистон Республикаси Бош прокуратурасига ишга киритиб қўйишни ваъда қилиб, 10 минг доллар олгани, яна 18 млн сўм талаб қилаётганидан шикоят қилишган.

Абдураззоқ исмли фуқаро ўз тузоғига илинган одамларга илгари ҳуқуқни муҳофаза қилувчи органлар тизимида ва Тошкент шаҳар ҳокимлигида ишлаганини айтган. Фирибгар уларга агарда Миллий гвардия, ички ишлар ва прокуратура органларига ишга киришга қийналиб юрган танишлари бўлса, ёрдам бера олишига ишонтирган.

Шундан сўнг тузоққа тушганлардан бири Андижон вилояти прокуратурасига ишга кириш учун Абдураззоқ таништирган Олий Мажлис Сенатида ишловчи опанинг кўрсатмаларига амал қилган ҳолда турли ташкилотларга боради ва у ердаги мутасаддиларни опа билан телефон орқали гаплаштиради.

Олий Мажлис Қонунчилик палатасида ишлашини айтган опанинг талаблари вилоят ташкилотлари мутасаддиларини саросимага солган. Баъзи бир ташкилотларда жабрланувчиларнинг ишлари маълум маънода ҳал этилган. Бунда юқори лавозимда ишловчи опа ишга кирувчидан яна 18 млн сўм пул талаб қилади. Шундан сўнг жабрланувчилар ҳуқуқни муҳофаза қилувчи органларга хабар беришади.

Тергов-суриштирув ишлари давомида Абдураззоқ ўрта-махсус маълумотга эга экани, илгари ҳеч қандай давлат ташкилотида ишламагани, олдин ҳам шу турдаги жиноятларни содир этгани учун 5 марта судлангани ва умрининг 25 йили жазони ижро этиш муассасаларида ўтгани маълум бўлди.

Қатор ташкилотларда ишловчи мансабдорлар билан телефон орқали суҳбат чоғида Олий Мажлис Сенатида ишловчи мартабали шахс деб таништирган аёлнинг сим-карта рақами ҳам Абдураззоқнинг ёнидан топилган.

«Дастлабки тергов жараёнида Абдураззоқ Аюпов муқаддам 5 марта шу каби жиноятларни содир этиб, жазо ўтагани, Олий Мажлис Сенатида ишловчи Сайёра Ғозиевна мавжуд эмаслиги, уяли телефон орқали аёл кишининг овозида ўзини Сайёра Ғозиевна деб таништириб, фуқароларни ишонтириб келгани аниқланди. Мазкур ҳолат юзасидан Абдураззоқ Аюповга нисбатан Жиноят кодексининг 168-моддаси (Фирибгарлик) билан жиноят иши қўзғатилиб, у эҳтиёт чораси сифатида қамоққа олинган. Ҳозирда дастлабки тергов ҳаракатлари олиб борилмоқда», дейилади расмий хабарда.

Қайд этилишича, айни пайтда Абдураззоқ Аюповнинг бошқа жиноятларга ҳам алоқадорлиги текширилмоқда. Тошкент шаҳар ИИББ  ушбу шахсдан жабр кўрганлар «102» рақами ёки яқин орадаги ички ишлар органларига хабар беришларини сўраган.

Кўпроқ янгиликлар