Асад махсус хизматининг собиқ зобитига Германияда суд ҳукми ўқилди. У бу ерга қочқин сифатида келган

Жаҳон 17:52 / 13.01.2022 7960

Бу ҳукм - Башар Асад режими содир этган жиноятлар бўйича илк суд жараёнининг бир қисмидир. Эшитувлар ўтган пайшанба куни бошланганди.

Маҳкум - 58 ёшли Анвар Раслан. Прокуратура талқинига кўра, 2011 йилда, Сурияни ҳукуматга қарши намойишлар тўлқини қамраб олганида у Сурия разведка хизмати полковниги бўлган ва Дамашқдаги «Ердаги дўзах» деган қайғули ном олган Ал-Хатиб қамоқхонасини бошқарган.

«Араб баҳори»нинг дастлабки икки йилида Башар Асад ҳукуматига қарши чиққанлардан камида тўрт минг нафари унинг буйруғи билан зўрланган, қийноққа солинган ва ўлдирилган.

Раслан билан бирга унинг собиқ ёрдамчиси, 43 ёшли Ияд А ҳам маҳкамага тортилган. Унинг иши бўйича суд ҳукми кейинроқ чиқарилади.

Ўтган йилда ушбу суд жараёнида Германия суди мухолифатчиларни ҳибсга олиш ишларига алоқадорликда айбланган Ияд ал-Ғариб 4,5 йиллик қамоқ жазосига ҳукм қилинганди.

Бу одамларнинг барчаси Германияга қочқин сифатида келиб, сиёсий бошпана сўраб мурожаат қилган. Лекин 2018-19 йилларда улар ҳибсга олинган.

Германия қонунчилигига кўра, ҳарбий жиноятлар, инсониятга қарши жиноятлар ва геноцид бўйича ишлар универсал юрисдикцияга киради ва мамлакат чегараларидан ташқарида содир этилган бўлса-да, немис судлари томонидан кўриб чиқилиши мумкин ҳисобланади.

Кўпроқ янгиликлар