Ma’lum qilinishicha, Chiroqchi tuman “Yangiqurilish” MFY Xo‘ja Abdujabbor qishlog‘i hududidagi yerdan chiqayotgan tutun Chiroqchi tuman nazorat inspeksiyasi inspektorlari, tuman FVB, Hududgaz ta’minot tuman filiali xodimlari tomonidan o‘rganilgan.

O‘rganish jarayonida taxminan 10 sotix yer maydoni avval yonib o‘chgani va hozirgi kunda taxminan 1 sotix yer ustidan tutun chiqib atrofga badbo‘y hid tarqalayotgani kuzatilgan.

O‘rganish davomida ushbu qishloqda yashovchi keksalar bu joy taxminan 50-70 yillar oldin chuqurlik joy bo‘lib, qamishzor bo‘lgani va yillar o‘tib qamishlar ustiga tuproq yopilib ketganini aytishdi.

Ushbu holat bo‘yicha geologiya sohasi mutaxassislarining o‘rganish o‘tkazib xulosalari taqdim qilingunga qadar, yer ostida qolib ketgan qamishlar qizishi va chirishi natijasida ushbu holat yuzaga kelgan degan dastlabki xulosa qilingan.

Qayd etilishicha, holatni o‘rganish ishlari davom etmoqda, o‘rganish yakunlari bo‘yicha batafsil ma’lumotlar taqdim etiladi.