Toshkent shahri Yunusobod tumanida sotuvchilik qilmoqchi bo‘lgan ayoldan 200 dollar joy haqi olayotgan firibgar IIBB xodimlari tomonidan ushlandi.

Ma'lum bo‘lishicha, Laylo ismli shaxs Yunusobod bozori atrofidagi yerosti yo‘lagida kiyim-kechak sotadiganlarga bu hudud unga qarashli ekanini aytib joy uchun oyiga 250 dollardan pul olgan.

Mazkur hududda 9 oydan beri savdo qilayotgan fuqarolardan biri firibgar to‘lov vaqti bir kun kechiksa ham tahdid qilganini aytadi.

“Birinchi bor kelganimda Laylo opa bu yerda savdo qilish oyiga 1 yarim mln so‘mdan boshlanishini aytdi. Mart va aprel oylarida 1,5 mln so‘mdan berdim. Keyin “har bir stolga 1,5 mln so‘mdan berasiz”, dedi. Maydan boshlab shu paytgacha 5 mln so‘mdan to‘lab, ishlab kelyapman.

Oxirgi paytda “narxi ko‘tarmasa chiqib keting, 6-7 mln so‘mga xaridor bor”, deyaverdi. Oyning har 10-sanasida pul berardim, agar sal kechiksa, “joyni bo‘shating boshqa odam qo‘yaman”, deydi. Mol olib qo‘yganman, pulni majbur beraman”, deydi savdogar.

O‘rganishlarga ko‘ra, firibgar 2021 yil fevraldan noyabr oyiga qadar fuqarolardan 73 mln so‘m o‘zlashtirgan.

“Aybimni tan olaman. Bir ayoldan savdo qilishi uchun 200 dollar pul so‘radim, u beraman dedi. O‘sha pulni olayotgan paytimda IIB xodimlari tomonidan to‘xtatilib, qamoqqa olib kelindim. Qilgan ishimdan afsusdaman. Adashdim”, deydi u aybiga iqror bo‘lib.

Toshkent shahar IIBB tomonidan mazkur holat yuzasidan Laylo ismli shaxsga nisbatan Jinoyat kodeksining 168-moddasi 2-qismi “a” bandi (firibgarlik) bilan jinoyat ishi qo‘zg‘atildi va qamoq ehtiyot chorasi qo‘llandi.