Левандовски, Месси, Жоржиньо ва Бензема. Tribuna.uz муаллифлари «Олтин тўп»га кимни лойиқ деб билишади?

Спорт 21:51 / 29.11.2021 10133

2021 календар йилида энг яхши футболчи ким бўлди, деган савол ҳанузгача муҳокамалар марказида бўлиб турибди. Тан олиш керакки, сўнгги йиллар давомида «Олтин тўп» учун бу қадар кўп муносиб номзодларнинг кураш олиб бориши кузатилмаётган эди. Ҳар ким ўз фаворитига эга ва ўз номзодини қолган даъвогарлардан устун эканлигига далиллар топиб бера олади. Хўш, Tribuna.uz муаллифлари яқин соатлар ичида ўз эгасига топширилувчи «Олтин тўп»га кимни энг муносиб, деб билишади? Уларнинг фикрларини эътиборингизга ҳавола этамиз.

Азиз Қаршиев

«Тарихан «Олтин тўп» халқаро майдонларда ёрқинроқ ўйин кўрсатган ва натижага эришган футболчиларга бериб келинган. Ушбу анъанага амал қилинса, бу сафар мукофотни сўзсиз «Челси» билан ЕЧЛ ғолиби, «мовия гвардия» билан Европа чемпиони бўлган Жоржиньо ўзиники қилиши керак эди.

Аммо у «Олтин тўп»га ҳақли эмас. Ҳозирда мухлислар «аристократлар» яримҳимоячисининг бирор феноменал ўйинини ажратиб кўрсата олмайди, у голларини асосан пенальтидан уради, аммо Қатар-2022 саралашида Швейцарияга қарши ҳал қилувчи ўйинда ҳал қилувчи пенальтини ура олмагани охир-оқибат Италияга қимматга тушиши мумкин. Кеча эса у «МЮ»га қарши ўйиндаги ҳаракати билан якуний учлик ёки бешликка ҳам лойиқ эмаслигини кўрсатиб қўйди.

Мукофот учун якуний 30талик рўйхатда Муҳаммад Салоҳ, Кевин де Брюйне ва Н'Голо Кантени ҳам ажратиб кўрсатиш мумкин. Улар ўз жамоаларида асосий футболчилар, улар исталган дақиқада индивидуал ҳаракатлари билан натижа келтириши мумкин, лекин йилнинг бош соврини учун уларнинг имкониятлари бироз пастроқ - кучлироқ мавсум ўтказган бошқалар бор.

Асосий фаворитлар - йил бошидан буён Роберт Левандовски ва Лионель Месси бўлиб келмоқда.

Польшалик форвард ўтган йили ўз тўпини олиши керак эди - у кўп йиллардан буён барқарор гол уриб келади, Германияда доим чемпион, ўтган мавсум Чемпионлар лигаси ғолиблигига эришди, фақат пандемия туфайли мукофот топширилмади.

Аммо бу йил у ҳақли эмас. Германияда чемпион бўлишни «Бавария» Левандовскисиз ҳам эплайди, қолаверса, у Польша билан Европа чемпионатида гуруҳдан чиқа олмади, жаҳон чемпионатига тўғридан тўғри йўлланма ололмади.

Мухлислар ҳамон Лионель Месси бу совринни яна бир бор ўзиники қилишини исташмоқда. У «Барселона»даги охирги мавсумини аъло даражада ўтказди, ҳиссиётларга бой бўлган Америка Кубогида ниҳоят терма жамоаси билан соврин ютди.

Аммо кейин Франция чемпионатига йўл олишга қарор қилди ва айни дамда янги жамоасига мослашиш жараёнини давом эттирмоқда.

Фото: Getty Images

Фаворитим - Карим Бензема. У голлар қалаштиришда польшалик рақобатчисидан ортда қолиши мумкин, лекин унинг футболга қўшган ҳиссаси кўпроқ. Унинг ёшлиги Криштиануга ёрдам бериш билан ўтди, лекин у ҳамиша тўп билан муомала қилишдаги нозик ҳаракатлари, қора ишдан қочмаслиги ва жамоа учун фойдали бўлиши билан мухлислар меҳрини қозониб келган. У Франция термаси кучайган даврда маиший можаро туфайли таркибга чақирилмади ва совринлардан қуруқ қолди. Лекин энди ўзи муносиб бўлган совринни олиш вақти келди.

Мукофотни жамоадошларнинг узатмаларини голларга айлантирганлик учун эмас, йил давомида яхши футбол намойиш этганлик учун бериш керак. Шу маънода, Левандовскига голлари учун «Олтин бутса» бериш етарли бўлади.

Агар Бенземага «Олтин тўп» берилмаса, бу худди 2010 йилда Андрес Иньестага ёки 2013 йилда Франк Риберига берилмагани каби баҳсли мукофот сифатида ёдда қолади»

Бобур Акмалов

«Менимча, «Олтин тўп»га лойиқ футболчи бу — Жоржиньо. Ютуқлар, совринларни чамалаб кўрсак, италиялик яримҳимоячига етадигани йўқ. Инсонларнинг хотираси қисқа. Шунинг учун, охирги ойлардаги феноменал ўйинлари сабаб Бензема ва Салоҳ дегувчилар ҳам топиляпти. Левандовски бутун йил давомида зўр ўйнади. Месси эса йил аввалида, баҳор-ёзда ажойиб ҳаракат қилди. Жоржиньода ҳам деярли шундай ҳолат. Лекин у жуда катта совринларни ютди ва бу борада ҳаммадан олдинда.

Фото: Getty Images

Шу жиҳатдан, мен жамоалари билан чемпионлик унвонларига эришган, Тухель қураётган жамоанинг асоси бўлиб хизмат қилаётган футболчини асосий номзод деб биламан. Левандовски ва Мессидан уни устун қўйган бўлардим. Ахир биз йилнинг энг яхши футболчиси ҳақида гаплашяпмиз. Тарихдаги энг яхши футболчи, йилнинг энг яхши футболчиси, ой футболчиси ёки энг машҳур футболчисини аниқламаяпмиз».

Ўткир Жалолхонов

«Агар «Олтин тўп» дунёнинг ҳозирги вақтда ўйнаётган энг зўр футболчисига берилганда, шубҳасиз, уни ҳар йил Месси олиши керак. Чунки Мессидан зўр футболчи йўқлигини бошқа футболчиларнинг ўзи ҳам инкор қилмаса керак. Аммо бу соврин бир календар йилида энг яхши ўйин кўрсатган футболчига берилади. 2021 йилда эса 2020 йилда бўлгани каби Роберт Левандовски ҳаммадан яхши бўлди. «Олтин тўп»ни айнан Левандовски олиши керак.

Фото: Getty Images

Мукофотни олиш учун фақат икки номзод бор деб ўйлайман: Месси ва Левандовски. Жоржиноьга «Олтин тўп» бериш керак дейдиганларни тушунмайман. Агар гап совринда бўлса, яна бироз кутишса, Жоржиньо клублар ўртасидаги жаҳон чемпионатини ютиб, у ерда пенальтидан гол уришга ҳам улгурса керак.

«Олтин тўп» кучли учлигига Левандовски, Месси ва Муҳаммад Салоҳ кириши адолатли бўлади. Шунингдек, Роналду ва Бруну Фернандеш ҳам жуда зўр йилни ўтказди».

Усмон Ибодов

«Олтин тўп» Роберт Левандовскига топширилмаса, футболда сўнгги икки йилдаги энг катта адолатсизлик шу бўлса керак. 2020 йилда Чемпионлар лигасида «Бавария» билан тенгсиз бўлиб, ўзи иштирок этган барча турнирларда ғолиб бўлиш билан бирга энг яхши тўпурарга ҳам айланган Роберт пандемия сабабли «Олтин тўп»сиз қолганди. 2021 йилда ҳам айнан у голлар сони бўйича Европада яққол етакчи – 64та гол.

Фото: Getty Images

Кўпчилик Америка кубогидаги ғолиблиги учунгина навбатдаги «Олтин тўп»га эга чиқиши лозим дея кўрсатаётган Месси Робертдан нақ 23та кам гол урган. «Олтин тўп» йил давомидаги энг яхши самарадорлик учун топширилса – Левандовски энг муносиби. Йўқ, йил давомидаги муҳим совринлар учун топширамиз дейишса, марҳамат – ЕЧЛ ва Евро бош совринини кўтарган Жоржиньога беринг.

Даъвогар бешлик тузилса рейтингим қуйидагича кўриниш олган бўларди: Левандовски, Жоржиньо, Месси, Бензема, Роналду.

Аъзамжон Иззатиллаев

«Олтин тўп»га Роберт Левандовски лойиқ. Месси, Бензема, Салоҳ ва бошқаларда тушиш-кўтарилишлар бўлди. Лекин польшалик форвард бир текис ўйин кўрсатиб, йил давомида тўхтовсиз гол урди. Фақат бир бор жиддий жароҳат олди ва айнан ўша пайтда «Бавария» ЕЧЛдан чиқиб кетди.

Фото: Getty Images

2-ўринда Месси. Лео ёзда Америка Кубогидаги ғалабадан сўнг яққол фаворитга айланганди. Аммо 2021/22 йили мавсум стартида унда пасайиш кузатилди, Европанинг даража жиҳатидан 6-лигасида 14-турга келибгина гол урди.

Бир ой аввал ҳам учликка Жоржиньони киритаётган эдим. У Италия билан Еврода, «Челси» сафида ЕЧЛда ғолиб бўлди. Лекин унинг фойдаланилмаган пенальтилари туфайли «мовий гвардия» яна жаҳон чемпионатисиз қолиши мумкин. Шу сабабли 3-поғонага сўнгги ойларда «монстр»га айланган Карим Бенземани қўяман.

Абдулвосид Валихонов

Бу галги «Олтин тўп»да нафақат лойиқлик, балки адолат факторлари ҳам роль ўйнаса керак. Катта эҳтимол билан уни Роберт Левандовски олади ва бу қайсидир маънода тўғри ҳам. 2020 йилги феноменал йил учун соврин олмаган ҳужумчига адолатни тиклаш учун ҳам «Олтин тўп»ни бериш мақсадга мувофиқ. Лекин аслида унга Месси лойиқ.

Фото: Getty Images

Фикримни қисқача изоҳлашга ҳаракат қиламан. Барча Левандовскини урган голларига қараб энг яхши футболчи, деб кўрсатмоқда. Лекин голлари учун унга «Олтин бутса» беришди-ку. У ва Мессининг позициялари ҳам ҳар хиллигини унутмаслик керак. Лео марказий ҳужумчи бўлмай туриб ҳам, 40дан зиёд гол уришга эришди. Левандовскидан фарқли равишда унга дарвоза олдигача тўпни олиб келиб беришмайди. Бундан ташқари, ёнингда Флик шакллантириб қўйган жамоанинг кучга тўлган футболчилари бўлса, ҳар қанча гол урсанг ҳам арзийди. Лекин Куман қўл остига йиғилган ёш болалар билан гол уриш бироз қийинроқдек эди ва Месси шунда ҳам ўзини йўқотиб қўймади.

Бундеслига даражаси АПЛ, Ла Лига ва А Серияники билан тенг эмаслигини ҳам унутмаслик керак. Германия кубогида 2-лига вакили «Хольштайн» «Бавария»ни турнирдан чиқариб юборди. Месси эса «Барса»га мана шу қийин йилда ҳам титул ютиб берди (Қирол кубоги).

Америка Кубогини ҳам у шунчаки Аргентина билан бирга бориб ютиб келмади. Мусобақа давомида 8та ўйинда майдонга тушиб, 4та гол ва 5та ассистни амалга оширди. 

Жоржиньо на «Челси»нинг, на Италиянинг алмаштириб бўлмас ўйинчиси бўлди. АПЛда ўтган мавсумда 28та ўйин ўтказди ва жамоаси билан 4-ўринни эгаллади. Исталган ўйинда унинг ўрнини Ковачич эгаллаши мумкин. Бензема эса Пичичи совринида ҳам Мессига имкониятни бой берди ва Миллатлар Лигасидан бошқа ҳеч бир мусобақада зафар қучмади.

Кўпроқ янгиликлар