Тошкент вилоятида икки тадбиркор 100 минг хонадоннинг бир кунлик истеъмолига тенг табиий газ ўғирлади

Иқтисодиёт 13:59 / 23.11.2021 25595

Энергетика вазирлиги штаби томонидан жорий йилнинг 17 ноябрь куни Тошкент вилоятининг Чирчиқ шаҳрида жойлашган SHIRINA PETROL МЧЖ ва Тошкент туманида жойлашган CLEAN GAS SERVICE МЧЖга қарашли автомобилларга газ тўлдириш компрессор шохобчаларида табиий газдан фойдаланиш қоидаларига риоя этилиши юзасидан текшириш ўтказилди.

Ўрганиш давомида фақат икки тадбиркор 1 млн 635 минг куб метр ёки бугунги кунда 100 минг хонадоннинг бир кунлик истеъмолига етарли миқдордаги табиий газдан ноқонуний фойдалангани аниқланган.

Хусусан, SHIRINA PETROL МЧЖ томонидан электрон газ ҳисоблаш ускунасига ташқи таъсир кўрсатиш имкони бўлгани ва ўтказилган эксперимент давомида конфигурация созламаси технологик йўриқномалар талабига мос эмаслиги сабабли қайта ҳисоб-китоб қилиниши натижасида 1 млрд 274 млн 700 минг сўм зарар етказилгани қайд этилган.

Шунингдек, CLEAN GAS SERVICE МЧЖ томонидан шартнома ҳужжатларидан ташқари 1 дона компрессор ускуна ортиқча ўрнатилгани сабабли қайта ҳисоб-китоб натижасида 360,5 млн сўм зарар етказилгани аниқланган.

Юқоридагилардан келиб чиқиб, ўтказилган текшириш ҳужжатлари қонун доирасида чора кўрилиши учун ҳуқуқни муҳофаза қилиш органларига юборилган.

Аввалроқ 22 кун ичида 400 мингдан ортиқ хонадон истеъмолига тенг газ, шунингдек ўтган 9 ойда 78 000 000 000 (78 млрд) сўмлик табиий газ ўғирлангани маълум қилинганди.

Кўпроқ янгиликлар