Шавкат Мирзиёев: Одамлар тиббиётда адолатни сезиши керак

Ўзбекистон 20:04 / 23.11.2021 12034

Давлат раҳбари Шайхонтоҳур туманидаги Марказий кўп тармоқли поликлиникани ҳам бориб кўрди.

Бу шифо маскани 1994 йилда қурилган, 2017 йилда реконструкция қилинган. Бу ерда терапия, неврология, кардиология, ревматология, аллергология, педиатрия, жарроҳлик каби бўлимлар, ташхис ускуналари мавжуд.

Ушбу марказий поликлиника ва унинг таркибидаги 9та оилавий поликлиника туманнинг 51та маҳалласида яшовчи 346 минг нафар аҳолига хизмат кўрсатмоқда.

Президент ушбу поликлиникалар негизида тиббиёт кластери ташкил этиш бўйича кўрсатма берди.

«Бу ерда тиббиёт соҳасига керакли ҳамма жиҳозлар, дори-дармонлар, тиббиёт ходимлари билан таъминлаймиз. Лекин аҳолининг қанча фоизи бугун давлат тиббиётидан фойдаланади? Жуда борса 35 фоизи бориши мумкин. Одамлар давлат шифохонасига бормаяпти. 

Туманнинг ўзига 7-8та тиббий бригада ажратилган. Ҳар бир бригадада ўзининг алоҳида оилавий шифокори бор. Шулар ҳар 100та хонадоннинг энг муҳтож бўлган 35тасига давлат томонидан бериладиган имкониятни яратиб, етказиб бера оляптими?

Замон талаби шундай: хусусий тиббиёт ривожланиб бораверади. Аҳолининг бир қисми хусусий клиникаларга боради. Лекин давлат барча аҳолини сифатли тиббиёт билан қамраб олиши керак. Шунинг учун бу ерни кластерга айлантириб, даволашни манзилли йўлга қўйиш, самарадорлиги ва қамровини ошириш зарур. Одамлар тиббиётда адолатни сезиши керак», деди президент.

Мирзиёев аҳолининг кам таъминланган қисмини сифатли тиббий хизмат билан таъминлаш зарурлигини таъкидлади.

Шунингдек, давлат раҳбари Шайхонтоҳур туманида болалар шифохонаси қуриш учун 30 млн доллар ажратилиши ҳақида топшириқ берди.

Кўпроқ янгиликлар