COVID-19 koronavirusi kelib chiqqan joy Xitoyning Uhan shahridagi bozor bo‘lib, uni birinchi bo‘lib yuqtirgan odam dengiz mahsulotlari sotuvchisi hisoblanadi. Amerikalik tadqiqotchi olimlar ana shunday xulosaga keldi.

“Virus “Xuanan” bozoriga Uhanning boshqa qismidan kelmagan. Dalillar virus bozorda paydo bo‘lgani va keyin uning atrofiga tarqalganini ko‘rsatmoqda”, – dedi tadqiqot mualliflaridan biri, evolyutsion biolog Maykl Uorobi.

Tadqiqot mualliflari pandemiya e'lon qilinguniga qadar aniqlangan barcha SARS-Cov-2 holatlarining batafsil jadvalini tuzib chiqdi. Kasallik yuqtirganlarning aksariyati “Xuanan” bozorida ishlagan yoki bozor atrofida yashagan.

Biologning so‘zlariga ko‘ra, tadqiqot natijalari virus bozorda sotilayotgan hayvonlardan kelib chiqqanini tasdiqlamoqda.

Mutaxassislar koronavirusning kelib chiqishi borasida yakdil xulosaga kelmagan. Aksariyat olimlar COVID-19 hayvonlardan tarqalgan degan fikrda. Ayrimlar esa u laboratoriyada yaratilgan degan fikrni ilgari surmoqda.