Kun.uz журналисти Шуҳрат Шокиржонов маҳаллаларда ҳоким ёрдамчилари лавозимига молия-иқтисодиёт секторида иш тажрибасига эга бўлган касб эгалари мажбуран ўтказилаётгани бўйича ҳолатни ёритиб чиқиши ортидан блогерлар ҳам ушбу мавзуга эътибор қаратди.
Жумладан, ҳуқуқшунос ва блогер Хушнудбек Худойбердиев ҳолатдан ҳайрон қолмаганини айтади.
“Умуман олганда, бу хабардан сира ҳайрон қолганим йўқ. Бирор янгиликни бундан бошқачароқ йўл билан ижро қилиш ҳақида ўйлаб ҳам кўришмаса керак. “Сен президент сиёсатига қаршимисан” деган гапларни ҳам 30 йилдан буён эшитиб, кўникиб қолдик.
Аслида барча эркин касб танлаш ҳуқуқига эга. Мажбурлаб кимнидир бошқа ишга ўтказиш мумкин эмас. Ҳар ҳолда қоғозда шунақа” – дейди у.
Davletov.uz телеграм канали ушбу ҳолатни “кадрлар геноциди” деб атаган:
“Шундоқ ҳам давлат ва жамият малакали кадрларга оч бўлиб турганда, бундай “кадрлар сиёсати” яхшилик келтирмайди. Бу билан ҳеч қанақа натижага эришилмайди. Шундоқ ҳам иш вақтидан кўп, ҳатто дам олиш кунлари ишлаётгани етмаётгандек, уларни қарийб мажбурлаб, истак-хоҳишига қарши бошқа ишга ўтказишни “кадрлар геноциди”, деб баҳоласаям бўлади”.
Отабек Бакиров ўз саҳифасида расмийлар ушбу бебошликларга муносабат билдирмаётганига эътибор қаратди.
“...на бу ишларнинг бошида турганлардан, на ҳукуматдан ва на ҳокимлардан бир жавоб бор. Гўёки бу ишлар бўлмаяпти. Гўёки Туркманистонда коронавирус йўқдек, гўё Ўзбекистонда “Ўткир иқтисодчилар”га кадрлар геноциди сиёсати қўлланмаяпти.
Парламент йўқ, “Инсон қадри учун” шиори ёзиб қўйилган кабинетларда бўлаётган ножоиз ишлар бўйича ҳукуматдан сўров сўрайдиган.
Судлар йўқ, жабрдийдалар шикоят қилса, ҳақиқатни юзага чиқарадиган ва ҳокимият ва ҳукуматнинг ноқонуний ҳаракатларига баҳо берадиган”, – дейди у.
Меҳнат ҳуқуқи билан боғлиқ масалаларни ёритувчи ҳуқуқшунос Саидали Мухторалиев айни вақтда ҳоким ёрдамчиси лавозимининг ўзи мавжуд эмаслигини таъкидламоқда.
“Ўртоқлар, ҳали “маҳаллалар бўйича ҳоким ёрдамчиси” деган лавозим очилганича йўқ. Ҳали очилмаган ва жорий қилинмаган лавозимга эса бирор бир шахсни ишга олиш ва лавозимга тайинлаш мумкин эмас. Бизда ана шу масалага оид “Маҳаллада тадбиркорликни ривожлантириш, аҳоли бандлигини таъминлаш ва камбағалликни қисқартириш масалалари бўйича ҳоким ёрдамчиси лавозимини жорий этиш чора-тадбирлари тўғрисида”ги Президент қарори лойиҳаси турибди. Лойиҳанинг 1-бандида шундай дейилмоқда: “2022 йил 1 январдан бошлаб республиканинг барча туман ва шаҳарларида ҳар бир маҳалла фуқаролар йиғини бўйича тадбиркорликни ривожлантириш, аҳоли бандлигини таъминлаш ва камбағалликни қисқартириш масалалари бўйича ҳоким ёрдамчиси лавозими ташкил этилсин”.
Яъни маҳалла бўйича ҳоким ёрдамчиси лавозими очилса ҳам кейинги йил бошидан ташкил қилинади. Ишга қабул қилиш тадбирлари ҳам кейинги йилдан бошланади. Бошқа томондан айрим ҳокимликлар ҳали жорий қилинмаган иш жойига ишга оламан деб “дўппининг ўрнига калла олинаётган” бўлиши ҳам мумкин. Яна бир тахминим, ҳокимликлар “ҳоким ёрдамчиси” лавозимларига ҳозирдан захира шакллантираётган бўлса, мана шу жараён мажбурлаб ишга олиш деб тушунилаётган бўлиши ҳам мумкин”, – дейди ҳуқуқшунос.
Эслатиб ўтамиз, Шавкат Мирзиёев ўтган ойда Сурхондарё вилоятида ўтказилган сайловолди учрашувида ҳар бир маҳаллада тадбиркорликни ривожлантириш ва камбағалликни қисқартириш бўйича «ҳоким ёрдамчилари» лавозимлари жорий этилиши ҳақида маълум қилган эди.
Ҳали бу амалиётнинг норматив ҳужжати тасдиқланмаган ва ҳуқуқий механизми яратилмаган бир пайтда Жиззах вилояти ҳокими «Маҳаллабай» ишлаш тизимини янги босқичга олиб чиқиш, маҳаллаларда давлат томонидан кўрсатиладиган хизматларни жойида тақдим этиш мақсадида янги механизм жорий этиш тўғрисида»ги 82-3-0-F/21 сонли фармойишни қабул қилди. Фармойиш билан вилоятдаги барча маҳаллаларга ҳоким ёрдамчилари тайинлаб бўлинган. Уларнинг аксарияти вилоятдаги банкларда катта-кичик лавозимларда ишлаган молия-иқтисодчилардир.
