Қайд этилишича, Турсунали Қўзиев 2021 йилнинг 5 ноябридан Туризм ва спорт вазирлиги ҳузуридаги Маданий мерос агентлиги директори вазифасини бажарувчиси сифатида иш бошлаган.

Турсунали Қўзиев 1954 йил Сурхондарё вилоятида туғилган, график рассом, кандакор, фото санъати устаси. Беньков номидаги Республика рассомлик билим юрти (1976) ва Тошкент театр ва рассомлик санъати институтини (1982) тугатган.

У иш фаолияти давомида Республика рассомлик билим юрти директори (1993—95), президент девони масъул ходими (1995—96), маданият ишлари вазирининг биринчи ўринбосари (1996—97), Бадиий академия раиси бўлиб ишлаган. 1999 йилда Ўзбекистон Республикаси санъат арбоби унвони билан тақдирланган.

Аввалроқ, Вазирлар Маҳкамаси томонидан «Туризм ва спорт вазирлиги ҳузуридаги Маданий мерос агентлиги тўғрисидаги низомни тасдиқлаш ҳақида»ги қарор қабул қилинганди.

Қуйидагилар агентликнинг вазифалари этиб белгиланди: моддий маданий мерос объектлари давлат реестри, электрон каталоги, паспорти ва давлат кадастрини юритиш; моддий маданий мероснинг кўчмас мулк объектларида асрашга доир ишларни амалга ошириш, буюртмачи функциясини бажариш; миллий музей фондининг давлат каталогини юритиш; тарихий-маданий ҳудудларни муҳофаза қилиш; археология тадқиқотларини қўллаб-қувватлаш, археология мероси объектларини муҳофаза қилиш; маданий бойликларни муҳофаза қилиш, шу жумладан уларнинг Ўзбекистон ҳудудидан олиб чиқилиши ва унинг ҳудудига олиб кирилиши бўйича сертификат бериш ва бошқалар.