Bloomberg: Rossiya sanksiyalarni chetlab o‘tish uchun Xitoy bilan dronlar ustida ishlamoqda

Moskva Ukrainaga zarbalar berish uchun mo‘ljallangan dronlarni ishlab chiqarish uchun G‘arb sanksiyalarini chetlab o‘tish maqsadida Pekin bilan do‘stona aloqalaridan foydalanishga harakat qilmoqda. Bu haqda Rossiyaning "Aero-xit" kompaniyasining ichki hujjatlari va Rossiya hukumati rasmiylari bilan yozishmalari asosida Bloomberg agentligi e’lon qilgan surishtiruvda aytiladi.

"Aero-xit" 2023 yil iyun oyida uchuvchisiz uchish apparatlari (UUA)ni ishlab chiqarish va ularga xizmat ko‘rsatish uchun tashkil etilgan. "Xabarovsk" ilg‘or rivojlanish hududi (TOR) rezidenti bo‘lgan kompaniya 2025 yil oxirigacha ishlab chiqarishni oyiga 15 ming donagacha kengaytirishni rejalashtirgan, deb xabar berdi 28 may kuni bosh vazir o‘rinbosari va prezidentning Uzoq Sharq federal okrugidagi vakili Yuriy Trutnevning matbuot xizmati. TOR Xitoy bilan chegara yaqinida joylashgan.

2024 yil iyun oyida AQSh moliya vazirligi "Aero-xit" kompaniyasiga qarshi sanksiyalar kiritib, u ishlab chiqargan "Veles" dron tashuvchilari «Xersonda joylashgan Rossiya kuchlari tomonidan Ukraina nishonlariga qarshi» foydalanilganini ta’kidladi. 

Bloomberg xabariga ko‘ra, 16 iyundagi maktubida "Aero-xit" Rossiya Mudofaa vazirligining maxsus loyihalar mulkini boshqarish boshlig‘iga Xitoyning Autel EVO Max 4T dronini chiqarishni mahalliylashtirish orqali ishlab chiqarishni kengaytirish uchun moliyaviy yordam so‘rab murojaat qilgan.

7,1 milliard rubl miqdoridagi investitsiyaviy moliyaviy rejalar va 28 oyga kutilayotgan yetkazib berish jadvalini o‘z ichiga olgan hujjatda Rossiya kompaniyasi Autel muhandislari bilan 2023 yil boshidan buyon hamkorlik qilib kelayotgani qayd etilgan.