Жаҳонгир Отажонов Туркияга учиб кета олмади. МИБ у уч нафар собиқ рафиқасига алимент тўламаганини айтмоқда

Жамият 13:03 / 19.10.2021 20671

17 октябрь куни YouTube платформасига жойлаштирилган видеомурожаатда қўшиқчи ўғлининг операцияси учун Истанбулга йўл олгани, бироқ тақиқ сабабли Ўзбекистонни тарк эта олмагани ҳақида айтади.

“Бугун соат саккиз яримда Урганч аэропортидан Истанбулга учиб кетишим керак эди. Сабаби – ўғлим футбол ўйнайди, елкаси синиб қолди. Операция қилинаётган пайтда олдида турай дегандим.

Афсуски, чегара назоратидагилар мени ўтказишмади. Паспортимни берганимда беш дақиқача текширишди-да, четга ўтиб кутиб туришимни сўрашди. Ўн-ўн беш дақиқадан кейин Р.Ўринбоев исмли ходим келиб, “Сизни [мамлакатдан] чиқара олмас эканмиз, МИБдан тақиқ қўйилган экан”, деб айтди.

Менинг МИБ билан умуман муаммом бўлиши мумкин эмас. Сабаби мен мана шундай муаммо келиб чиқмаслиги учун ҳар ой МИБдаги инспекторга алимент тўловларим ҳақида Телеграм орқали ҳисобот топшираман. Аслида бу маълумотлар уларга боради, шунга қарамай эртага қандайдир муаммо келиб чиқса, асос сифатида кўрсатишим учун тўловларни ўз вақтида тўлаганим ҳақида квитанцияларни юбориб қўярдим”, дейди Жаҳонгир Отажонов ўз видеомурожаатида.

Қўшиқчининг ижтимоий тармоқдаги чиқиши юзасидан МИБ 19 октябрь куни муносабат билдирди. Расмий баёнотда "Суд ҳужжатлари ва бошқа органлар ҳужжатларини ижро этиш тўғрисида"ги қонуннинг 42-1-моддасига асосан Жаҳонгир Отажоновнинг Ўзбекистон Республикасидан чиқиш ҳуқуқи вақтинча чеклангани ҳақида сўз боради.

“Аниқланишича, Бюро органлари томонидан фуқаро Ж.Отажоновга нисбатан судларнинг тегишли қарорларига асосан фуқаролар С.Ф., М.С. ва Е.И. фойдасига 3 нафар вояга етмаган фарзандлари учун алимент ундиришга оид 3та ижро ишлари юритилган.

Хусусан, Фуқаролик ишлари бўйича Урганч туманлараро судининг ижро ҳужжатларига асосан қарздор Ж.Отажоновдан ундирувчилар М.С. ва Е.И. фойдасига алимент ундириш белгиланиб, Бюронинг Юнусобод туман бўлими томонидан мажбурий ижро ҳаракатлари олиб борилган ва унинг Ўзбекистон Республикасидан чиқиш ҳуқуқи "Суд ҳужжатлари ва бошқа органлар ҳужжатларини ижро этиш тўғрисида"ги Қонуннинг 42-1-моддасига асосан вақтинча чекланган.

Фуқаро С.Ф. фойдасига алимент ундириш тўғрисидаги ижро ҳужжати эса, унинг аризасига асосан ижросиз қайтарилган ва ижро иши тамомланган”, дейилади баёнотда.

Эслатиб ўтамиз, аввалроқ Жаҳонгир Отажоновнинг ижтимоий тармоқдаги чиқиши ички ишлар органи ходимларини ҳақоратлаш деб топилиб, у суд томонидан Маъмурий жавобгарлик тўғрисидаги кодекснинг 41-моддаси билан айбли топилган, бироқ у МЖтКнинг 21-моддасига кўра жавобгарликдан озод этилган эди.

Кўпроқ янгиликлар