Milliy universitet huzuridagi Yarim o‘tkazgichlar fizikasi instituti faoliyati kuchaytiriladi

Vazirlar Mahkamasi qarori bilan muqobil energetika, elektrotexnika hamda mikroelektronika sanoatini rivojlantirish, yarimo‘tkazgichlar fizikasi sohasidagi ilmiy tadqiqotlar natijadorligini oshirishni davlat tomonidan qo‘llab-quvvatlash, shuningdek, Mirzo Ulug‘bek nomidagi Milliy universitet huzuridagi Yarim o‘tkazgichlar fizikasi va mikroelektronika ilmiy-tadqiqot instituti faoliyatini kuchaytirish chora-tadbirlari belgilandi.

Foto: Unsplash

Quyidagilarni nazarda tutuvchi maqsadli kompleks dastur tasdiqlandi:

muqobil energetika, elektrotexnika sanoati, mikro- va nanoelektronikani rivojlantirish maqsadida sohaga yuqori malakali mutaxassislar, ilmiy va ilmiy-pedagog kadrlarni tayyorlash;

ilm-fan va ta'lim integratsiyalashuvini chuqurlashtirish, yoshlarni ilm-fanga jalb etishga shart-sharoitlar yaratish, ularning ilmiy izlanishlarini qo‘llab-quvvatlash;

moddiy-texnika bazasini rivojlantirish, yangi ilmiy natijalarni tijoratlashtirishga ko‘maklashuvchi tuzilmalarni tashkil etish.

Yarim o‘tkazgichlar fizikasi va mikroelektronika ilmiy-tadqiqot instituti tuzilmasida:

«Yarimo‘tkazgichlar materialshunosligi» laboratoriyasi negizida «Mikroelektronika va elektrotexnika materialshunosligi» laboratoriyasi;

«Geliofizika va muqobil energiya manbalari» laboratoriyasi negizida «Muqobil energiya manbalari» laboratoriyasi;

«Yadro-fizikaviy tadqiqotlar» laboratoriyasi negizida «Yadro fizikaviy tadqiqot metodlari» laboratoriyasi tashkil etiladi.

Bundan tashqari, hujjat bilan Yarim o‘tkazgichlar fizikasi va mikroelektronika ilmiy-tadqiqot instituti tuzilmasi tasdiqlandi. Institut tuzilmasida yuridik shaxs maqomiga ega bo‘lmagan yarim o‘tkazgichlar fizikasi sohasidagi oliy ta'lim muassasalararo konstruktorlik-tajriba byurosiga ega bo‘lgan Mikroelektronika ilmiy-innovatsion markazi tashkil etiladi.

#muqobil energetika #yarim o‘tkazgich