Пахтачидаги боғчада гўшт ўғирланиши бўйича жиноят иши қўзғатилди

Жамият 12:28 / 17.10.2021 8818

Kun.uz’да Самарқанд вилояти Пахтачи туманида жойлашган боғчада ошпаз ва хўжалик ишлари мудири гўшт ўғирлагани ва мазкур ўғрилик вилоят МТБ томонидан тасдиқлангани ҳақида хабар берилганди. Бош прокуратура матбуот котиби Ҳаёт Шамсутдиновнинг хабар беришича боғчадаги ўғрилик юзасидан жиноят иши қўзғатилган.

«Мактабгача таълим вазирлиги томонидан Пахтачи туманидаги 28-сонли ДМТТда гўшт маҳсулотлари талон-торож қилинаётгани ҳолати юзасидан расмий муносабат билдирилган. Мазкур ҳолат юзасидан Пахтачи тумани прокуратураси томонидан ўтказилган текшириш натижаларига кўра, 28-сонли давлат мактабгача таълим ташкилоти мансабдор шахсларига нисбатан Жиноят кодексининг 167-моддаси (Ўзлаштириш ёки растрата йўли билан талон-торож қилиш) билан жиноят иши қўзғатилган. Тергов ҳаракатлари олиб борилмоқда», дейилади хабарда.

Мактабгача таълим вазирлиги билдирган муносабатда ёзилишича, Пахтачи туман Ҳайит Элбеги маҳалласида жойлашган 28-сонли боғча бош ошпази Ў.А. пиширилган 4,7 килограмм гўштни олиб аввал кирхонага яшириб қўйган. Сўнг уни боғчанинг хўжалик мудираси М.Э.га берган.

Хўжалик мудираси М.Э. 4,7 гўштни боғча ҳовлисидан олиб чиқиб кетаётганда шу боғчада тарбиячи бўлиб ишлайдиган Н.Н ҳамда М.У томонидан тўхтатиб қолинган ва ҳолат видео ва аудио шаклда ёзиб олинган.

Ушбу ҳолат бўйича боғча бош ошпази Ў.А. ҳамда хўжалик мудираси М.Э. билан суҳбат ўтказилганда улар 28-боғча директори Ш.У.нинг топшириғи ва кўрсатмасига анчадан буён гўшт ўғирлашларини айтишган. Улар боғча тарбиячилари Н.Н ҳамда М. У.нинг айтган гапларни ва улар томонидан олинган видео ва аудио ёзувлардаги лавҳалар тўғри эканини ўз тушунтириш хатларида тасдиқлаган.

Таъкидланишича, ҳозирда 28-боғча бош ошпази Ў.А. ва хўжалик мудираси М.Э. билан тузилган меҳнат шартномаси бекор қилинган.

«28-мактабгача таълим ташкилотидаги мазкур ҳолат юзасидан ҳуқуқни муҳофаза қилувчи мутасадди ташкилотлар томонидан қонун доирасида тегишли чоралар кўрилишини маълум қиламиз», дейилган муносабатда.

Кўпроқ янгиликлар