“Ўзбекгидроэнерго” АЖ: Халқаро кредит рейтинг даражаси кўтарилди

Жамият 21:03 / 16.10.2021 3321

Жамият Fitch Ratings халқаро рейтинг агентлигида ўз рейтингини янгилади. Яъни 2020 йилда Жамият рейтинги B+ (барқарор) бўлган бўлса, 2021 йилда Жамият рейтинги BB- (барқарор) даражасига кўтарилди. Шуниси маълумки, мазкур йилда берилган рейтинг ўтган молия йилининг натижалари, яъни 2020 йилнинг натижалари сарҳисобига берилган баҳо ҳисобланади.

Fitch Ratings халқаро рейтинг агентлиги “Ўзбекгидроэнерго” АЖнинг нафақат молиявий-иқтисодий ҳолатини ўрганди, балки унинг корпоратив бошқарув тизимини, бизнес стратегиясини, ички норматив ҳужжатларининг юритилиши ва бошқа йўналишларни чуқур ўрганиб, таҳлил қилди. Жамиятда фаолият юритаётган минглаб ишчи-ходимларнинг меҳнати самараси ва рейтинг агентлиги томонидан олиб борилган ўрганишлар, чуқур таҳлиллар ҳамда корхоналар фаолиятининг одил баҳоланиши натижасида “Ўзбекгидроэнерго” АЖ республикада ишлаб чиқарувчи корхоналар орасида биринчилардан бўлиб Fitch Ratings халқаро кредит рейтингининг “BB-” даражасини қўлга киритди.

Бунинг натижасида 2020 йилда режада белгиланган 6 та инвестиция лойиҳаси ишга туширилди ва ўтган йилларда бошланган режадаги яна 3 та лойиҳанинг 2 таси, 2021 йилда ишга туширилган бўлса, 1 таси йил якунига қадар ишга туширилади. Натижада йилига қўшимча равишда 774,3 млн кВт.соат электр энергиясини ишлаб чиқариш имкони яратилади. Жамият томонидан жорий йилда қурилиш ишлари бошланган, умумий қуввати 187 МВт бўлган 7 та лойиҳа 2022 йилда ишга туширилади.

Давлатимиз раҳбарининг “Давлат иштирокидаги корхоналарни ислоҳ қилишни жадаллаштириш ҳамда давлат активларини хусусийлаштиришга оид чора-тадбирлар тўғрисида”ги ПФ-6096-сон қарорига мувофиқ жамиятнинг транформация дастури ишлаб чиқилди ҳамда янгича корпоратив маданият амалда жорий этилди.

Шу билан бирга дунёнинг илғор консалтинг компаниялари жалб қилинди. Жумладан, молия соҳасига Pricewaterhousecoopers рақамли трансформация бўйича Россиянинг X-Holdings, корпоратив бошқарув ва инвестиция дастурини қайта кўриб чиқиш учун McKinsey & Company корхоналари билан ҳамкорлик ўрнатилиб, Жамиятни ривожлантириш бўйича зарурий маслаҳат ва тавсиялар олинди.

Шунингдек, республикамизнинг сув ресурсларидан оқилона фойдаланиш ва янги истиқболли лойиҳаларни аниқлаш ҳамда амалга оширилаётган лойиҳаларнинг хавфсизлигини ошириш мақсадида, Осиё тараққиёт банкининг грант маблағлари ҳисобига Германиянинг Tractable Engineering компанияси жалб қилинди. Натижада гидроэнергетика тармоғининг 2030 йилгача ривожланиш дастури ишлаб чиқилди.

Шу ўринда, Жамият томонидан халқаро кредит рейтингининг бир поғона ўсиши, халқаро кредит рейтинги, яъни “BB-“ барқарор даражасининг “B+”барқарор даражасидан фарқи Жамият томонидан амалга оширилаётган инвестиция лойиҳаларининг арзонлашишига, шу билан бирга, молиявий институтлардан жалб этилаётган кредит фоизларининг камайишига сабаб бўлади.

Мазкур рейтинг даражаси, “Ўзбекгидроэнерго” АЖни жаҳоннинг машҳур инвесторлар бозорларига аниқ ва равшан бизнес стратегиясига, шаффоф молиявий ҳисоботларига ва кучли корпоратив бошқарув тизимига эга биринчи ўзбек ишлаб чиқарувчи корхонаси сифатида танитади.

Қўлга киритилган мазкур ютуқ, келгусида “Ўзбекгидроэнерго” АЖнинг иқтисодий барқарорлигини янада оширишга хизмат қилади ҳамда инвестиция лойиҳаларини амалга оширишда хорижий кредитларни давлат кафолатисиз тўғридан тўғри инвестиция маблағларини жалб қилиш имкониятини беради.

“Ўзбекгидроэнерго” АЖ ушбу ютуқ билан чегараланиб қолмайди, келгуси йилларда рейтинг даражасини янада ошириш ҳамда уни барқарор сақлаб қолиш йўлида изчил ва жадал фаолиятни давом эттиради.

“Ўзбекгидроэнерго” АЖ Матбуот хизмати Ⓣ

Кўпроқ янгиликлар