Mahallaning 72 xo‘jalik istiqomat qiluvchi bu qismida yashovchilarning o‘zlari hikoya qilib berishicha, ular elektr ta'minoti bilan bog‘liq muammolardan qiynalishmoqda. Ushbu hududda asosan yangi imorat ko‘targanlar yashashmoqda.

 Bir paytlar elektr energiyasi sovuq fasllarda ko‘p o‘chaverganidan turli tashkilot va idoralarga, xalq qabulxonasiga murojaat qilaverishgach, mahallaga 2020 yilning noyabrida 160 kVA.lik quvvatga ega yangi transformator nimstansiyasi o‘rnatilgan.

Lekin shunga qaramasdan mahalla ahlining og‘iri yengil bo‘lgani yo‘q. To‘g‘ri, elektrning dam-badam uzilishiga birmuncha chek qo‘yilgan. Ammo mahallaning bosh ko‘chasida yo‘l yoqasidagi tadbirkorlar shu transformatorga ulanib, o‘z bizneslarini yo‘lga qo‘yishgan. Bu yerda turli sexlar, payvand apparati ishlatadigan temirchilik ustaxonalari bor.

«Kuchlanish ayrim vaqtlarda 120 voltgacha tushib qolmoqda. Kun davomida tok ko‘p o‘ynaydi, past baland bo‘lib. Maishiy texnikalarimiz, energiya tejamkor lampochkalarimiz ishdan chiqmoqda», deydi shu yerda istiqomat qiluvchi onaxonlardan biri.

Mahallada istiqomat qiluvchi yoshi katta otaxonlardan biri esa bu borada tegishli idoralarga, prokuraturaga ham murojaat qilib ko‘rishgani, murojaatlar natijasiz qolganini aytib o‘tdi.

Bu yerda yashovchilar bizni o‘z xonadonlariga taklif etib, stabilizatordagi elektr kuchlanishini ko‘rsatishdi. Darhaqiqat, me'yordagidan kam.

Xullas, mahalla ahlining talabi shunday: hududda tadbirkorlik sub'yektlari uchun alohida transformator nimstansiyasi ishga tushirilishi kerak. Yoki aholi uchun mo‘ljallangan trasformatorning kuchlanishi kattarog‘iga almashtirilishi lozim.

Mutasaddi idoralar, «Hududiy elektr tarmoqlari» AJning Jizzax va G‘allaoroldagi bo‘limlari ushbu muammoni o‘rganib, o‘z munosabatini taqdim etadi, degan umiddamiz.

Shuhrat Shokirjonov, Kun.uz muxbiri,

Fotomuxbir: Jahongir Aliboyev.