«Заковат» брейн-ринг: Хоразм ва Навоий финалга чиқди. Олти Gentra учун баҳс эртага бўлади

Жамият 16:47 / 11.10.2021 8751

Бухорода ўтказилаётган «Заковат» брейн-ринг республика босқичида финалчилар аниқланди. Хоразм жамоаси муросасиз кечган баҳсда Тошкент жамоасини қўшимча саволлар эвазига мағлуб этиб, финалга чиқди. Қизиғи, Тошкент жамоасида тажрибали заковатчилар ўйнашганига қарамай, хоразмлик билимдонлар ирода кўрсатиб, кучли рақибдан ўтишди.

Иккинчи яримфиналда эса Сирдарё жамоаси (улар чоракфиналда Самарқандни икки марталаб енгган эди) Навоийга қарши ўйинда ҳеч нарса қила олмади. Мантиқий жиҳатдан анча кучлилик қилган навоийликлар 5:0 ҳисобида ғалаба қозониб, финалга чиқди.

Шу тариқа, Навоий ва Хоразм жамоалари эртага, 12 октябр куни Бухорода ўтадиган финалда куч синашади.

Маълумот учун, дастлаб «Заковат» брейн-ринг ўйинлари бутун республика бўйлаб ўтказилди. Барча вилоятдаги ҳудудий ғолиблар 100 миллион сўмдан мукофотни қўлга киритган. Республика бўйича ғолиб бўлган 13 жамоа ва энг яхши иккинчи ўринни қўлга киритган 3 жамоа гранд финал баҳсларида иштирок этишди.

Финалда ғолиб бўлажак жамоанинг ҳар бир аъзосига биттадан (жами олтита) Chevrolet Gentra машинаси совға қилинади.

Ўткир Жалолхонов, Kun.uz мухбири,
Тасвирчи — Жаҳонгир Алибоев.

Кўпроқ янгиликлар