Фуқаронинг “Ласетти”сини ичида ёш бола бўлишига қарамай ҳайдаб кетган ЙҲХ ходимига чора кўрилди

Жамият 15:45 / 08.10.2021 10243

Қашқадарё вилоятида хизмати давомида хато ва камчиликларга йўл қўйган Яккабоғ тумани ИИБ ЙҲХБ ЙПХ ходими лавозимидан озод этилган. Бу ҳақда ИИВ ЙҲХББ ахборот хизмати хабар бермоқда.

Жорий йил август ойида ижтимоий тармоқларда Яккабоғ туманида ЙПХ ходими З.Ҳусанов фуқаролардан бирининг Lacetti машинасини ичида ёш бола бўлган ҳолда миниб кетиб қолгани тасвирланган видео тарқалганди. Кейинчалик маълум бўлишича, З.Ҳусанов машинани жарима майдончасига жойлаштириб, унинг ичида бўлган ёш болани жарима майдончаси қоровулига ташлаб кетган. Ўшанда ИИВ ЙҲХББ ахборот хизмати ходимнинг хатти-ҳаракатлари юзасидан хизмат текшируви ўтказилаётгани ҳақида хабар берганди. Маълум бўлишича, хизмат текшируви якунига кўра, Яккабоғ тумани ИИБ ЙҲХБ ЙПХ ходими З.Ҳусанов лавозимидан озод этилган.

Қайд этилишича, ўтказилган хизмат текширувига кўра, Яккабоғ тумани ИИБ ЙҲХБ ЙПХ инспектори З.Ҳусанов хизмат фаолияти давомида интизомий жазоланганига қарамасдан ўзига тегишли хулоса чиқармаган. У хизмат мобайнида Вазирлар Маҳкамасининг 2018 йил 1 декабрдаги 975-сон қарори билан тасдиқланган «Йўл-патруль хизмати ходимларининг йўл ҳаракати қатнашчилари билан ўзаро муносабатлари ҳамда махсус мосламалардан фойдаланиши тартиби тўғрисидаги Низом» ҳамда ички ишлар вазирининг меъёрий буйруғи талабларини бузган.

Шу сабабли Яккабоғ тумани ИИБ ЙҲХБ ЙПХ инспектори З.Ҳусанов эгаллаб турган лавозимидан озод этилиши бўйича хулоса қилинган.

Кўпроқ янгиликлар