Бизнес-омбудсманга тадбиркорлар ҳуқуқини ҳимоя қилиш бўйича маъмурий ишларни кўриш ваколати берилади – лойиҳа

Жамият 12:31 / 08.10.2021 2784

Олий Мажлис Қонунчилик палатаси матбуот хизматининг маълум қилишича, бу каби ҳолатларнинг олдини олиш ва президент Шавкат Мирзиёевнинг таклифи асосида «Ўзбекистон Республикасининг Маъмурий жавобгарлик тўғрисидаги кодексига ўзгартишлар киритиш ҳақида»ги қонун лойиҳаси кўриб чиқилмоқда. Унга кўра, хусусий мулкни ҳимоя қилиш билан боғлиқ мазкур муаммоли вазиятларни бартараф этиш мақсадида қонунчиликни такомиллаштириш, жумладан, Маъмурий жавобгарлик тўғрисидаги кодексда Президент ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакилга маъмурий ҳуқуқбузарликлар тўғрисидаги ишларини кўриб чиқиш ваколати берилиши назарда тутилган.

«Депутатлар қонун ташаббускорларидан лойиҳада назарда тутилаётган бир қатор нормалар ва ноаниқликлар юзасидан тушунтиришларни талаб қилди. Муҳокамалар натижасида берилган саволлар юзасидан тегишли жавоблар олиниб, қонун лойиҳаси қўллаб-қувватланди», – дейилади парламент қуйи палатаси ахборотида.

Бундан ташқари, ЎзЛиДеП фракциясининг йиғилишида депутатлар кўриб чиққан «Ўзбекистон Республикасининг Маъмурий жавобгарлик тўғрисидаги кодексига ўзгартиш ва қўшимчалар киритиш ҳақида»ги қонун лойиҳаси асосида маъмурий ҳуқуқбузарликларнинг хавфлилик даражасидан келиб чиқиб мақбуллаштириш мақсадида 5 та модданинг санкцияси миқдорини камайтириш назарда тутилган.

Жумладан, муддати ўтган суғурта полиси ёки суғурта полисида назарда тутилмаган шахс томонидан автотранспорт воситасини бошқарганлик учун белгиланадиган жарима миқдори икки бараварга (135-1-модданинг биринчи қисми), транспорт воситалари эгалари томонидан суғурта полисини олмаганлик учун жарима фуқаролар учун икки бараварга, мансабдор шахсларга эса учдан бир қисмга камайтирилмоқда.

Фуқаролар томонидан валюта қийматликларини ноқонуний олиш ёки ўтказиш учун жарима миқдори базавий ҳисоблаш миқдорининг ўн бараваридан йигирма бараваригача бўлган миқдор оралиғида белгиланиб, бухгалтерия ҳисоби ва ҳисоботи тартибини бузганлик учун мансабдор шахсларга нисбатан жарималар миқдори деярли икки бараварга камайтирилмоқда.

Кўпроқ янгиликлар