Qashqadaryo viloyati Qarshi tumanida yashovchi shaxs uy talashish ortidan kelib chiqqan janjal paytida o‘z nabirasini pichoqlab qo‘ygan. Bu haqda viloyat IIB axborot xizmati xabar bermoqda.
Ma'lum qilinishicha, 2021 yil 29 avgust kuni soat 22:00 larda Qarshi tumani Paxtazor mahallasida yashovchi nafaqaxo‘r T.O. nabirasi G‘.O. bilan uy-joy masalasida janjallashib qolgan.
Janjal davomida bobo nabirasining chap tomon qorin old sohasiga bir marotaba pichoq sanchib, unga tan jarohati yetkazgan. Oqibatda G‘.O. tan jarohati olib shifoxonaga yotqizilgan.
Qayd etilishicha, mazkur hodisa yuzasidan Qarshi tumani IIB tergov bo‘limi tomonidan jinoyat kodeksning tegishli moddasi bilan jinoiy ish qo‘zg‘atilgan.
