“Toshkent viloyati va shahridagi 46 ta issiqxona faoliyati to‘xtatildi” – Ekologiya vazirligi

16-17 yanvar kunlari Toshkent shahri havosida ifloslanish ortgani ortidan davlat Ekologik nazorati inspeksiyasi va hududiy bo‘linmalar Toshkent viloyati va shahridagi 486 ta issiqxonalarda o‘rganish o‘tkazdi. Bu haqda Ekologiya vazirligi ma’lum qildi.

O‘rganish davomida Zangiota, Qibray, Toshkent tumanlari, Toshkent shahrining Mirzo Ulug‘bek, Yashnobod, Bektemir, Olmazor tumanlaridagi issiqxonalarning 440 tasi faoliyat yuritayotgani, 46 ta issiqxona (Zangiota tumanida 16 ta, Qibray tumanida 10 ta, Toshkent tumanida 4 ta, Yunusobod tumanida 11 ta, M.Ulug‘bek tumanida 5 ta) mavsumiy bo‘lgani, ya’ni qozonxonasi yo‘qligi sababli ishlamayotgani aniqlangan.

Vazirlikka ko‘ra, Toshkent shahri va Toshkent viloyati bilan chegaradosh bo‘lgan Toshkent halqa avtomobil yo‘li bo‘ylab 9 ta nuqtadan havoning ifloslanishi bo‘yicha ko‘chma laboratoriya orqali THAYda Eshonguzar aholi yashash punktidan Toshkent Pediatriya tibbiyot institutigacha bo‘lgan hududda havoning ifloslanish darajasi tahlil qilingan. Natijada PM2,5 va PM10 ifloslantiruvchi moddalar miqdori 0,05 mgdan 540 mggacha ortib ketgani aniqlangan.

“Dudbo‘rondan foydalanish qoidalarini buzgan jami 37 ta issiqxona egalariga ma’muriy jarimalar qo‘llandi, 46 ta issiqxona faoliyati to‘xtatildi, 426 ta issiqxona egalari ekologik talablarga javob beradigan chang-gaz tozalash uskunalarini o‘rnatish, rezina qoldiqlari va boshqa chiqindilardan yoqilg‘i sifatida foydalanmaslik yuzasidan ogohlantirildi. Nazorat tadbirlari davom etyapti”, – deyiladi rasmiy xabarda.