Oliy Majlis Qonunchilik palatasi axborot xizmatining xabar berishicha, ichimlik suvi ta'minoti va oqova suv chiqarish masalalari bugungi kunga qadar qonun darajasida tartibga solinmagan. Amaldagi qonunchilikda ichimlik suvi va oqova suv xizmatlari iste'molchilarining majburiyatlari aniq belgilangan bo‘lib, suv ta'minoti tashkilotlarining majburiyatlari esa mustahkamlanmagan.
Rasmiy relizda syv ta'minoti tashkilotlari faoliyatida intizomning sustligi oqibatida quvurlarda nosozliklar vujudga kelmoqda va iste'molchilar tomonidan ularga noqonuniy ulanish holatlari kuzatilayotgani ta'kidlanadi.
Qayd etilishicha, “Ichimlik suvi ta'minoti va oqova suv chiqarish to‘g‘risida”gi qonuni loyihasida suv ta'minoti tashkilotlarining ushbu sohadagi majburiyatlari va huquqlari belgilanmoqda.
“Mazkur hujjat bilan ichimlik suvi va oqova suv quvurlarining iste'molchi hududiga tutashgan qismigacha ichimlik suvi ta'minoti tashkiloti mas'ul hisoblanishi nazarda tutilib, iste'molchilarga asossiz hisoblangan to‘lovlarning 50 foiziga teng miqdorda ichimlik suvi ta'minoti tashkilotidan kompensatsiya (penya) talab qilish huquqi berilmoqda.
Taklif etilayotgan qonun loyihasining qabul qilinishi natijasida sohani barqaror rivojlantirish va xizmatlar sifatini oshirishga mo‘ljallangan ta'sirchan huquqiy baza yaratilishi, suv ta'minoti tashkilotlari faoliyatida intizomni kuchaytirish orqali nosozliklar oqibatida ichimlik suvi isrof qilinishining oldi olinadi”, deyiladi parlament quyi palatasi xabarida.
Eslatib o‘tamiz, bugungi kunda O‘zbekiston aholisining 65 foizi markazlashgan ichimlik suvi va 17 foizi oqova suv xizmatlari bilan ta'minlangan. 17ta suv ta'minoti tashkiloti tomonidan 9 408 ta suv ta'minoti, 58 ta kanalizatsiya inshooti, 72 ming km ichimlik suvi hamda 8,6 ming km oqova suv tarmoqlari orqali xizmatlar ko‘rsatilib kelinmoqda.
Avvalroq “O‘zsuvta'minot” departament boshlig‘i Zuhriddin Zayniddinov foydalanilgan ichimlik suvi uchun to‘lovlar undirilishi 50-60 foizligicha qolayotgani, shu bois kelajakda ichimlik suvi tarmog‘ida ham “aqlli hisoblagich”lar o‘rnatilishi rejalashtirilayotganini ma'lum qilgandi.
