Qashqadaryo viloyati Chiroqchi tumanida sodir bo‘lgan yo‘l-transport hodisasi oqibatida uch kishi vafot etgan. Bu haqda viloyat IIB YHXB xabar bermoqda.

Ma'lum qilinishicha, 2021 yil 12 iyul kuni soat 9:20larda davlat ahamiyatidagi 4R-87 Yettitom-Qarshi avtomobil yo‘lining Chiroqchi tumani hududidan o‘tuvchi 53-kilometrida odam o‘limi bilan bog‘liq yo‘l-transport hodisasi ro‘y bergan.

Chiroqchi tumani Toshli hududida harakatlanib kelayotgan «Neksiya-1» mashinasi haydovchisi boshqaruvni yo‘qotib, qaraama-qarshi yo‘nalishda harakatlanib kelayotgan «Neksiya-2» mashinasi bilan o‘zaro to‘qnashgan.

Oqibatda «Neksiya-1» mashinasida yo‘lovchi sifatida kelayotgan ikki nafar fuqaro, «Neksiya-2» mashinasida bo‘lgan bir nafar fuqaro og‘ir tan jarohatlari olib, vafot etgan. Shuningdek, har ikkala mashina haydovchilari og‘ir tan jarohatlari olib, shifoxonaga yotqizilgan.

Dastlabki surishtiruvda aniqlanishicha, haydovchilar mashinalarni belgilangan me'yordan tez boshqargan.

Qayd etilishicha, hodisa yuzasidan Chiroqchi tumani IIB YHXB tomonidan surishtiruv o‘tkazilmoqda. Bundan tashqari, mutasaddilar ishtirokida aholi orasida yo‘l qoidalariga amal qilmaslik oqibatida kelib chiqishi mumkin bo‘lgan og‘ir holatlar muhokama qilingan.