Kun.uz Farg‘ona shahrining Juydam mahallasida umrguzaronlik qilib kelayotgan Qahramon Ahmedov haqida lavha e'lon qilgan edi. Bu lavhani ko‘rgan ortidan ko‘plab saxovatpesha hamyurtlarimiz jismoniy imkoniyatlari cheklangan Qahramon akaga yordam qilish niyatida ekanliklarini aytishdi.
Yaxshi insonlar tufayli Qahramon akaning azaliy orzusi ushaldi: unga bir emas ikki skuter olib berildi. 16 yil unga xizmat qilib kelgan aravasi yoniga zamonaviy 2 skuter qo‘shildi.
«Toshkent shahridan kelishib elektroskuter tashlab ketishdi. Amerikada yashovchi hamyurtimiz ham shunday skuter uchun pul jo‘natdi. Ehsonlari qabul bo‘lgan bo‘lsin. Umrlari uzoq bo‘lsin. Murod-maqsadlariga yetishsin. Avvalgidan ko‘ra hozirgi holatim ancha yaxshi. Bozorga borib kelish uchun avvallari bir yarim soat vaqt sarflar edim. Endi esa yarim soatda borib kelyapman», — deydi Qahramon Ahmedov.
U ayni paytda elektroskuterlarini birini «zaryad»ga qo‘yib, ikkinchisini haydab almashib minib yuribdi.
«Zaryadi tugaganini uyga qo‘yib, ikkinchisi minyapman. Skuterni boshqarishda qiyinchilik yo‘q, Allohga shukr. Lavhadan keyin Amerika, Rossiya va boshqa chet davlatlarda yashaydigan hamyurtlarimizdan qo‘ng‘iroqlar bo‘ldi. Pul jo‘natgan odamlarga mingdan ming rahmat aytib qolaman. Skuterdan ortib qolgan pulga qurilish materiallari ham sotib oldim. Xursand bo‘lganimdan yayrab hammalarini duo qilib minib yuribman. Meni xursand qilganlarni Yaratgan xursand qilsin», — deydi Qahramon aka jo‘shib.
Ko‘cha-ko‘yda Qahramon akani skuter haydab yurganini ko‘rgan mahalladoshlari uni tabriklashib, ehson qilganlar haqqiga duo qilishar edi. Qahramon aka esa o‘zida yo‘q xursand. Uning ortiqcha jismoniy kuch sarflab, issiqlarda ko‘cha kezgan kunlari ortda qoldi.
Rafiqasi Hafiza opaga ham lavha ortidan hokimiyat tomonidan tikuv mashinalari olib berilibdi. Mutasaddilar oilaning yangi bir muammosiga e'tibor qaratishgan: ular yashayotgan hovlining kadastr hujjatlari ham tayyor bo‘lyapti. Asosiysi, Qahramon akaning og‘iri yengil bo‘lib, qiyinchiliksiz bozorga borib kelyapti.
Sarvar Ziyayev, Kun.uz muxbiri
