Вазир ўринбосари: «Рақамли тиббиёт беморда ҳам, шифокорда ҳам масъулиятни оширади»

Ўзбекистон 13:47 / 10.06.2021 3143

Абдулла Азизовнинг сўзларига кўра, тиббиётда рақамлаштириш – тиббий маълумотлар базасини шакллантириш, бу орқали беморга қўйиладиган ташхиснинг тўғрилигини кафолатлаш, ушбу маълумотларга асосланиб, яъни сунъий интеллект орқали диагноз қўйишни йўлга қўйиш каби имкониятларни яратади.

«Масалан, Эстонияда автоматлаштирилган тизим орқали ташхис қўйилади. Ҳозирда улар томонидан қўйилаётган диагнознинг 80 фоизи тўғри қўйилмоқда. Қолган 20 фоизида шифокор аралашуви талаб этилади.

Рақамлаштириш беморда ҳам ўз саломатлигига масъулиятни оширади. Мисол учун, Данияга меҳмонга борган онамнинг тоби қочди. Антибиотик дорилар олиши кераклиги маълум бўлди. У ерда тўғридан тўғри бориб дори олишнинг имкони йўқ. Лекин шифокордан рецепт олиш учун ўша ерда яшаётган акамнинг ёки менинг номимга ёздиришимиз керак. Лекин рецепт ёзилгач, у касаллик тарихида қолади ва қачондир акам ёки мен касал бўлсак, шифокор касаллик тарихимиздаги ўша антибиотик ҳақида маълумот олиб, шунга қараб даволайди. Рақамлаштириш беморда ҳам, шифокорда ҳам масъулият, жавобгарликни биринчи ўринга чиқаради.

Ўзбекистонда эса 12 варақли дафтар бизнинг касаллик тарихимиз ҳисобланади. Ҳеч қандай жавобгарлик йўқ. Исталган одам исталганча антибиотик олиши мумкин. Ривожланган давлатларда бу фақат шифокор рецепти билангина олинади», дея унинг сўзларини келтирмоқда Kun.uz мухбири.

 Вазир ўринбосари Ўзбекистонда тиббиётни рақамлаштириш тизими Тошкент шаҳрида, Андижон ва Навоий вилоятларида яхши йўлга қўйилаётганини таъкидлади. Сурхондарё ва Қашқадарё вилоятларида эса техник омиллар сабаб ортда қолиш кузатилган.

«Бу тизим фақат қайсидир ҳудуд учун жорий қилинмайди. Бутун республика бўйлаб йўлга қўйилади. Масалан, «Электрон шифохона» платформаси Тошкентда ишлаб, Қорақалпоғистонда ишламаса, барча ҳаракатларимиз бефойда. Ҳаммаси қоғозда қолаверади. Эски тизим, нотўғри ташхислаш амалда қолаверади. Шунинг учун барча вилоятларни бир хилда қамраб олишни мақсад қилганмиз», деди Абдулла Азизов.

Кўпроқ янгиликлар