Самарқанддаги шифохонада илк марта буйрак кўчириб ўтказиш амалиёти ўтказилди

Жамият 19:36 / 10.06.2021 501

Самарқанд шаҳридаги вилоят кўп тармоқли тиббиёт марказида илк марта буйрак кўчириб ўтказиш амалиёти ўтказилган. Бу ҳақда вилоят соғлиқни сақлаш бошқармаси ахборот хизмати хабар бермоқда.

Маълум қилинишича, бугун, 10 июнь куни академик В.Воҳидов номидаги республика ихтисослаштирилган хирургия илмий-амалий тиббиёт маркази мутахассислари самарқандлик шифокорлар билан биргаликда вилоят кўп тармоқли тиббиёт марказида илк марта буйрак кўчириб ўтказиш амалиётини муваффақиятли ўтказишган.

Бунга қадар буйрак трансплантацияси операцияси Ўзбекистонда фақатгина Тошкент шаҳрида Республика шошилинч тиббий ёрдам илмий маркази ва В. Воҳидов номидаги республика ихтисослаштирилган хирургия илмий-амалий тиббиёт марказида амалга ошириб келинган.

Қайд этилишича, булунғурлик беморга акаси донорлик қилган ва жарроҳлик амалиёти қарийб уч соат давом этган. Муваффақиятли чиққан амалиётдан сўнг ҳар иккаласининг ҳам аҳволи яхши бўлиб, улар тиббий стандартлар асосида шифокорлар назоратида қолган.

Таъкидланишича, яна икки нафар бемор яқин кунларда жарроҳлик амалиёти ўтказиш учун тайёрланмоқда. Уларнинг ҳар иккаласига ҳам туққан онаси донорлик қилишга қарор қилган.

Кўпроқ янгиликлар