O‘zbekistonning Amerika Qo‘shma Shtatlaridagi elchisi Javlon Vahobov va AQSh vitse-prezidentining maxsus maslahatchisi Liza Soyyer o‘rtasida bo‘lib o‘tgan uchrashuvda Oliy Majlis Senati raisi Tanzila Norboyeva bilan AQSh vitse-prezidenti Kamala Harris o‘rtasida uchrashuv o‘tkazishning istiqbollari muhokama qilindi.

«Dunyo» axborot agentligining ma'lum qilishicha, bo‘lajak uchrashuvda gender tenglikni rag‘batlantirish, Afg‘onistondagi ayollar uchun iqtisodiy imkoniyatlarni kengaytirish sohasidagi hamkorlikni chuqurlashtirish kun tartibining asosiy mavzusiga aylanishi kutilmoqda.

Uchrashuvda AQSh tomoni O‘zbekistonda xotin-qizlarning jamiyatdagi o‘rnini oshirish borasida qilinayotgan ishlarni yuqori baholagan hamda xotin-qizlar tadbirkorligi va ijtimoiy-iqtisodiy faolligini qo‘llab-quvvatlashga qaratilgan O‘zbekiston, AQSh va Afg‘oniston uch tomonlama ayollar biznes-forumini o‘tkazish istiqbollari ko‘rib chiqildi.

Shuningdek, muzokaralar davomida Oq uyning COVID-19ga qarshi kurashish maqsadida boshqa mamlakatlarni 80 millionga yaqin AstraZeneca, Pfizer, Moderna va Johnson & Johnson preparatlari bilan ta'minlash rejasi doirasida O‘zbekistonga ham vaksina ajratilishi bilan bog‘liq masala muhokama etildi.