Qashqadaryo viloyatida joylashgan Mingchinor muntazam yo‘l-patrul xizmati maskanida tegishli hujjatlarsiz olib ketilayotgan 600 kilogramm go‘sht to‘xtatib qolingan. Bu haqda viloyat IIB axborot xizmati xabar bermoqda.

Ma'lum qilinishicha, 2021 yil 7 aprel kuni «Mingchinor» muntazam YPX maskanida Kitob tumanida yashovchi Sh.B. «Kia bongo» rusumli yuk mashinasida 600 kilogramm yirik shoxli mol go‘shtini tegishli veterinariya ma'lumotnomasi bo‘lmagan holda olib ketayotgani aniqlanib, tegishli tartibda bayonnoma rasmiylashtirilgan.

Qayd etilishicha, so‘nggi paytlarda viloyatda sifatsiz go‘sht mahsulotlarini sotish holati ko‘paygan. Viloyatdagi bozorlar, savdo obektlarida joylashgan qassobxonalarda veterinariya, sanitariya qoidalari va me'yorlariga rioya etilishi bo‘yicha tekshiruvlar hamda reydlar o‘tkazilganda, bir qator qoida buzilishi holatlari aniqlangan, Jumladan, go‘sht mahsulotlarini sotishda kamchiliklarga yo‘l qo‘ygan va yaroqsiz mahsulotlar sotgan 74 nafar shaxsga nisbatan ma'muriy bayonnoma rasmiylashtirilgan.