Huawei taklifiga binoan axborot-kommunikatsiya texnologiyalari, raqamli iqtisodiyot va IT sohasida kadrlarni tayyorlashga ixtisoslashgan universitetlar rahbarlari kompaniya jamoasining bir qismi bo‘lishni istagan universitet bitiruvchilari uchun yaratilgan yangi sharoitlar bilan tanishish maqsadida kompaniya ofisiga tashrif buyurishdi. Shu kuni Texnik yechimlarni tayyorlash va sotishni qo‘llab-quvvatlash markazi (TSSC) joylashgan binoning rasmiy ochilish marosimi ham bo‘lib o‘tdi. Mazkur markaz Huawei Uzbekistan'da 2012 yilda ochilgan bo‘lib, u Markaziy Osiyo va Yevropa mamlakatlaridagi, hamda Rossiyadagi sotuv jarayonini texnik qo‘llab-quvvatlash bo‘yicha beshta global markazlardan biri hisoblanadi.
Toshkent Axborot texnologiyalari universiteti, Toshkentdagi INHA universiteti, Toshkentdagi YEOJU instituti, Toshkentdagi Amity universiteti, Toshkent shahridagi Turin politexnika universiteti, shuningdek MGIMO'ning Toshkentdagi filiali rektorlari ochilish marosimida ishtirok etishdi, yangi ofisni ko‘zdan kechirishdi va kompaniyaning yangi yechimlari bilan tanishishdi.
Marosimdan so‘ng, universitet rektorlari va kompaniya rahbariyati bilan davra suhbati tashkil etildi va uchrashuv davomida Huawei o‘zining AKT sohasida kadrlar tayyorlash, iqtidorli bitiruvchilarga amaliyot o‘tash imkoniyatlarini taqdim etish va ularni ish bilan ta'minlash bo‘yicha kelgusidagi rejalari bilan bo‘lishdi. Muhokama qilingan yana bir mavzu AKT sohasida o‘qituvchilar va mutaxassislarni tayyorlash, yosh avlod o‘rtasida raqamli texnologiyalar bilan ishlash ko‘nikmalarini ommalashtirish, mutaxassisliklarni yaratish va optimallashtirish, o‘quv dasturlari tizimini mukammallashtirish va laboratoriyalarni qurishda hamkorlik qilish maqsadida mahalliy universitetlarda Huawei kompaniyasining “AKT akademiyasi”ni ochish masalasi bo‘ldi. Mazkur dastur O‘zbekiston talabalariga AKT mahsulotlari va Huawei texnologiyalaridan foydalanish imkoniyatini taqdim etadi, Huawei kompaniyasining sertifikatlash dasturida ishtirok etishlariga imkon yaratadi va O‘zbekistonda jamiyatga va AKT sanoatiga foyda keltirishga qodir iste'dodlarning rivojlanishiga yordam beradi.
Suhbat davomida universitetlar rektorlari o‘z muassasalarida “AKT akademiyasi” loyihasini ishga tushirishni qo‘llab-quvvatlashlarini va Huawei kompaniyasi bilan yaqin hamkorlikni davom ettirishga tayyorliklarini aytishdi.
“Bugun biz universitetlar rahbarlarini ular O‘zbekistonning iqtidorli yoshlari uchun AKT sohasida, jumladan 5G va sun'iy intellekt kabi so‘nggi texnologiyalarni o‘rganish, kompaniyamizda amaliyot o‘tash, yaxshi maosh to‘lanadigan ish bilan ta'minlash, shuningdek, ishlash uchun ham, bo‘sh vaqtni mazmunli o‘tkazish uchun ham xalqaro darajadagi sharoitlarni yaratish borasida qanday imkoniyatlar ochib berilayotganligiga o‘zlari ishonch hosil qilishlari uchun taklif qildik. Huawei kompaniyasi axborot texnologiyalari sohasida, sanoatning ilmiy salohiyatini rivojlantirishda va qimmatli raqamli kadrlarni shakllantirishda O‘zbekistonning yetakchi universitetlari bilan hamkorlikni davom ettirishga to‘liq tayyorligini ma'lum qiladi”, – deydi Huawei Uzbekistan direktori Lyu Tszyasin.
Suhbat davomida rektorlar o‘zlarining fikrlari va g‘oyalari bilan bo‘lishdilar, shuningdek, eng muhim masalalarni, yangi imkoniyatlarni va ta'lim dasturlari prizmasi orqali AKT sanoatini rivojlantirish yo‘nalishini muhokama qilish uchun mana shu shaklda tez-tez yig‘ilib turishga kelishib olishdi.
Huawei kompaniyasi 20 yildan buyon O‘zbekistonda o‘z faoliyatini yuritib kelmoqda va AKT sohasida bo‘lajak mutaxassislarni qo‘llab-quvvatlashga katta e'tibor qaratmoqda. Kompaniya O‘zbekistondagi IT universitetlari bilan olib borayotgan uzoq muddatli hamkorligi asosida 7 yildan buyon Seeds for the Future loyihasini amalga oshirib kelmoqda. 2021 yil noyabr oyida loyiha onlayn shaklda bo‘lib o‘tadi, shu bilan birga unda ishtirok etish uchun taklif qilingan universitetlar ro‘yxati kengaytiriladi va ko‘p sonli talabalar qamrab olinadi.
Huawei Uzbekistan kompaniyasi Matbuot xizmati
