Otabek Nazirov O‘zbekiston to‘g‘ridan to‘g‘ri investitsiyalar jamg‘armasi bosh direktori etib tayinlandi

Otabek Nazirov investitsiyalar va tashqi savdo vazirining maslahatchisi – O‘zbekiston Respublikasining to‘g‘ridan to‘g‘ri investitsiyalar jamg‘armasi bosh direktori etib tayinlandi.

Joriy yilning 31 mart kuni investitsiyalar va tashqi savdo vazirining maslahatchisi – O‘zbekiston Respublikasining to‘g‘ridan to‘g‘ri investitsiyalar jamg‘armasi rahbari lavozimiga Otabek Nazirov tayinlandi.

Ushbu jamg‘arma raqobatbardosh mahalliy kompaniyalarga investitsiyalar kiritish, shuningdek, xususiy mahalliy va xorijiy investorlar bilan uzoq muddatli o‘zaro foydali sheriklik munosabatlarini yo‘lga qo‘yish maqsadida tashkil etilgan.

Jamg‘arma asoschisi Tiklanish va taraqqiyot jamg‘armasi hisoblanadi, faoliyati esa Investitsiyalar va tashqi savdo vazirligi tomonidan muvofiqlashtiriladi.

Otabek Nazirov 1975 yil Toshkent shahrida tug‘ilgan, 1998 yilda makroiqtisodiyot ixtisosligi bo‘yicha AQShdagi Nyu-York davlat universitetini tamomlagan. AQShdagi Goldman Sachs va JPMorgan Chase, Rossiyadagi “Troyka Dialog”, “MDM-Bank” kabi moliyaviy va investitsiya kompaniyalarida, shuningdek, London shahrida Yevropa tiklanish va taraqqiyot bankida ishlagan.

U O‘zbekistonda o‘z faoliyatini 2018 yilda innovatsion rivojlanish vazirining o‘rinbosari lavozimida boshlagan, keyinchalik xalq ta'limi vazirining o‘rinbosari sifatida faoliyat yuritgan. 2019 yilning yanvar oyidan buyon Kapital bozorini rivojlantirish agentligi direktori lavozimida ishlab kelgan.