Gulchehra Boboqulova majburiy davolanishdan so‘ng Rossiyadan chiqarib yuboriladi - OAV

Ichki ishlar vazirligi 2017 yilda Boboqulovaning Rossiyada qolishi nomaqbul deb topilganini ma'lum qildi. «Davolash jarayoni tugaganidan so‘ng, u Rossiyadan tashqariga deportatsiya qilinishi kerak», - deya xabar berdi mahkama. Ichki ishlar vazirligi Boboqulovaning davolanish jarayoni qachon tugashiga aniqlik kiritmagan.

Fevral oyida «Moskovskiy komsomolets» Boboqulova Qozon shahridagi ruhiy kasalliklar shifoxonasida ekani haqida xabar bergandi (bu ma'lumot rasman oshkor etilmayapti). Ayolning onasi aytishicha, shifokorlar Boboqulovaning ahvolini barqaror deb baholashgan va agar tegishli hujjatlar kelib tushsa, uni deportatsiya qilishga tayyor turishibdi. 

Boboqulova tomonidan o‘ldirilgan qizning onasi Yevgeniya Meshcheryakova davolanish jarayoni tugaganidan so‘ng, sobiq enaga oiladan qasos olishi mumkinligidan qo‘rqmoqda.

Qotillik 2016 yilning fevral oyida sodir bo‘lgandi. O‘zbekistonlik enaga Gulchehra Boboqulova Moskva shahrida qizchaning ota-onasi to‘ng‘ich farzandini olib, uydan ketishini poylab, 4 yoshli qizni o‘ldirib, kvartirani yoqib yuborgan va ko‘chaga chiqib ketgan. Guvohlarning so‘zlariga ko‘ra, ayol 20 daqiqacha vaqt ko‘chada qizchaning tanasidan judo qilingan kallasini ushlab, o‘zi bilan o‘zi suhbatlashgan va yo‘lovchilar hamda politsiya xodimlariga tahdid qilgan. Qotilni metroga tushish joyida qo‘lga olishga muvaffaq bo‘lishgan.