Қайд этилишича, 2020 йилнинг 24 ноябрдан бошлаб республика барча ҳудудларида мутасадди идоралар, ташкилотлар ҳамда жамоатчилик тузилмалари билан ҳамкорликда ноқонуний пиротехника маҳсулотларининг олиб кирилишига, мамлакат ичида сақланиши, сотилиши ва ишлатилишига йўл қўймаслик мақсадларида амалга оширилиб келинган тезкор-профилактик тадбирлар давомида ҳуқуқбузарлардан 1561та ҳолат бўйича 3 млрд 414 млн 70 минг 121 сўм қийматидаги 12 млн 127 минг 68 дона пиротехника воситалари олиб қўйилган. 265 нафар ҳуқуқбузар маъмурий, 17 нафари эса жиноий жавобгарликка тортилган, 1055та ҳолат юзасидан тўпланган ҳужжатлар қонуний чоралар кўриш учун суд идораларига юборилган.
Лойиҳада қуйидагилар назарда тутилмоқда:
- жисмоний ва юридик шахслар томонидан хлопушка ва бенгал мушакларидан ташқари маиший мақсаддаги пиротехника буюмларининг якка тартибда фойдаланиш мақсадида эркин олиб кирилиши, сотиб олиниши, ташилиши ва сақланиши тақиқланмоқда;
- техник ва махсус мақсаддаги пиротехника буюмларидан (хавфлиликнинг III-V класслари) фойдаланишга фақатгина Ўзбекистон президенти ёки Вазирлар Маҳкамасининг қарорларига мувофиқ ташкил этиладиган оммавий тадбирларни ўтказиш жараёнида, Ички ишлар вазирлиги тақдимномасига кўра ҳукуматнинг алоҳида фармойиши асосида тегишли лицензияга эга бўлган юридик шахслар томонидан олиб кирилишига ва улардан фойдаланишга рухсат берилади, саноат мақсадидагилар бундан мустасно;
- оммавий тадбирларни ўтказиш жараёнида барча турдаги хлопушка ва бенгал мушаклари, техник ва махсус мақсаддаги пиротехника буюмларидан фойдаланиш Вазирлар Маҳкамасининг 205-сон қарори билан тасдиқланган Оммавий тадбирларни ўтказиш қоидаларига мувофиқ бериладиган оммавий тадбирни ўтказишга доир рухсатнома бўйича оммавий тадбир дастури асосида амалга оширилади.
Билдирилишича, лойиҳанинг қабул қилиниши:
- барча турдаги пиротехника буюмларининг муомаласини тартибга солувчи амалдаги норматив-ҳуқуқий ҳужжатлар замонавий талаблар ва эҳтиёжларга мувофиқлаштирилишига;
- соҳани давлат томонидан тартибга солиш ва назоратни амалга ошириш механизми такомиллаштирилишига хизмат қилади.
