Иқтисодиётда долларлашув даражаси 45 фоизга туширилади – МБ

Иқтисодиёт 21:32 / 12.01.2021 5409

Марказий банк раиси ўринбосари Беҳзод Ҳамроев 11 январ куни АОКАда ўтган матбуот анжуманида МБ томонидан жорий йилда иқтисодиётда долларлашув даражасини камайтириш масалалари ҳақида маълумот берди. Бу ҳақда Kun.uz мухбири хабар бермоқда.

«Иқтисодиётда долларлашув даражаси юқори, қарийб 50 фоиз атрофида. 2021 йилда кредитлар бўйича долларлашув даражасини 45 фоизга тушириш вазифаси қўйилган», – деди Марказий банк раиси ўринбосари.

Шунингдек, жорий йилда валюта бозорида янгича онлайн платформа жорий қилиш, тадбиркорлар ва юридик шахслар учун банкларда валюта олди-сотдисини осонлаштириш режалаштирилгани айтилди.

Аввалроқ Капитал бозорини ривожлантириш агентлиги бошқарма бошлиғи (айни пайтда директор ўринбосари) Турсунбой Маҳкамов Ўзбекистон иқтисодиётида долларлашув даражасининг юқорилиги Марказий банк монетар сиёсати самарадорлигини пасайтириши, айрим ҳолларда дефолтга олиб келиши мумкинлиги ҳақида айтганди.

Унинг сўзларига кўра, Ўзбекистон иқтисодиётининг долларлашув даражаси жуда юқори эканини ҳамма тушунмоқда, аммо валюта хатарлари орасидаги фарқни йўқотиш учун мамлакатда олтин-валюта захиралари етарли экани туфайли (2019 йил 1 январ ҳолатига 26,3 млрд АҚШ доллари) «бунга катта эътибор беришмаяпти».

Маълумот учун, Марказий банк раиси пул-кредит сиёсатининг 2020-2022 йилларга мўлжалланган асосий йўналишлари ҳамда инфляцион таргетлаш режимига ўтиш масалаларига бағишланган матбуот анжуманида долларлашув масалаларига тўхталган эди.

Кўпроқ янгиликлар