KXDR Janubiy Koreya bilan chegarada joylashgan yopiq Keson sanoat parkiga olib boruvchi elektr uzatish tarmoqlarini demontaj qilmoqda, deb xabar beradi Yonhap agentligi.

Seul ma’lumotlariga ko‘ra, Koreya xalq armiyasi askarlari 24 noyabr kuni ish boshlagan va Kyonison yo‘li bo‘yidagi ayrim ustunlardagi elektr uzatish tarmoqlarini uzib bo‘lgan. Janubiy Koreya hukumati KXDR 2020 yil iyundan beri ishlamayotgan elektr uzatish tarmoqlari ustunlarini ham demontaj qilishini kutmoqda. Mazkur hududda elektr energiyasi ta’minoti Kesondagi Koreyalararo aloqa idorasi portlatilganidan keyin uzilgan.

Elektr uzatish tarmoqlari Janubiy Koreya tomonidan qurilgan. Umumiy hisobda sanoat kompleksiga elektr energiyasini yetkazishga mo‘ljallangan 48 ta tayanch minorasi o‘rnatilgan, ularning 15 tasi KXDR hududida joylashgan.

Shimoliy va Janubiy Koreyani 4 kilometr kenglikdagi demilitarizatsiya zonasi ajratib turadi. KXDR yil boshida o‘z chegarasiga minalar o‘rnatgan va yoritish tizimlarini olib tashlagan edi.

Oktyabr boshlarida KXDR harbiylari «janubiy chegaralarni qal’aga aylantirish» maqsadida Janubiy Koreyaga eltuvchi barcha avtomobil va temiryo‘llarini yopishga va’da bergandi. Oradan ko‘p o‘tmay Shimoliy Koreya mamlakatning yangi konstitutsiyasida Janubiy Koreya rasman «dushman davlat» sifatida belgilanishini tasdiqlagan edi.