2020 йилда Ўзбекистонга 60 минг бошдан ортиқ қорамол ва 36,6 минг қўй олиб кирилган

Иқтисодиёт 18:47 / 08.01.2021 5183

Ўзбекистонда чорвачиликни ривожлантиришга доир қатор қарорлар қабул қилинди. Шу билан бирга, чорва импорти ҳам катта ҳажмда амалга оширилмоқда. Жумладан, ўтган 2020 йилда Ўзбекистонга жами 60 097 бош қорамол олиб кирилган бўлса, уларнинг 36 584 боши наслли, 23 513 боши наслсиз қорамоллардир.

Ветеринария ва чорвачиликни ривожлантириш давлат қўмитасининг Kun.uz’га тақдим этган маълумотига кўра бу қорамолларни олиб кириш учун жами 90 млн АҚШ долларидан кўпроқ маблағ сарфланган.

Шунингдек, қиймати деярли 5 млн долларлик 36 616 бош қўй, 797 минг долларга тенг 3683 бош эчки ҳам импорт қилинган. Ўтган бир йил давомида Ўзбекистон бирор бош чорва экспорт қилмаган.

Қорамоллар, қўй ва эчкилар асосан Россия, Беларус, Украина, Қозоғистон, Қирғизистон, Австрия, Германия, Нидерландия, Дания, Чехия ва Венгриядан импорт қилинган.

Маълум қилинишича, чорва импорт қилувчи тадбиркорлар дастлаб қўмитага мурожаат қилади ва агар чорва экспорт қилувчи давлат «қизил» ҳудудда бўлмаса, уларга рухсатнома расмийлаштириб берилади. Шу рухсатнома асосида экспортер давлатдан чорва харид қилинади ва 30 кун карантиндан кейин Ўзбекистонга олиб кирилади.

Кўпроқ янгиликлар