Yoshlar orasida ko‘pchilik Amerika, Yevropa ta'lim standarti bo‘yicha tahsil olishni, xalqaro diplomga ega bo‘lishni istaydi. Biroq chet eldagi nufuzli oliygohlarga qabul qilinish har doim ham oson kechmaydi. Shuningdek, ota-onalar farzandlarini olis qit'adagi o‘qishga yuborishni har doim ham qo‘llab-quvvatlashmaydi.
Endilikda qo‘shni davlatda ham Amerika ta'limi bo‘yicha tahsil olish imkoni mavjud. AQSh Markaziy Osiyo Ta'lim Fondi (US-CAEF) mintaqadagi yetakchi universitet - Markaziy Osiyodagi Amerika Universitetida (American University of Central Asia, Qirg‘iziston poytaxti Bishkekda joylashgan) tahsil olish uchun stipendiyalar ajratadi. Oliygoh Qirg‘izistonning Bishkek shahrida joylashgan.
US-CAEF ta'lim granti to‘liq to‘rt yillik o‘qish muddatini o‘z ichiga oladi. Dasturda o‘qish to‘lovlaridan tashqari, oylik stipendiya, turar joy va sayohat xarajatlari ta'minlanadi. Akademik tajriba maxsus yo‘nalishni rivojlantirish, o‘qitish, pullik mahalliy va xalqaro amaliyotlar orqali malaka oshirish bilan to‘ldiriladi.
US-CAEF Enterprise Fellowship – AQSh Markaziy Osiyo Ta'lim Fondi tomonidan homiylik qilinadigan va Xalqaro ta'lim bo‘yicha Amerika Kengashlari tomonidan boshqariladigan akademik grant bo‘lib, AQSh davlat departamenti tomonidan moliyalashtiriladi.
Markaziy Osiyodagi Amerika Universitetida (American University of Central Asia) quyidagi mutaxassisliklar bo‘yicha tahsil olish mumkin:
- Biznes boshqaruvi;
- Iqtisodiyot;
- Dasturiy ta'minot;
- Amaliy matematika va informatika;
Kimlar ta'lim stipendiyasini qo‘lga kiritishi mumkin?
- O‘zbekiston fuqarolari;
- Maktab yoki litsey/kollej bitiruvchilari;
- Moliyaviy yordamga muhtoj o‘quvchilar;
- US-CAEF va Amerika Kengashlari xodimlari bilan bog‘liq bo‘lmaganlar;
- Ingliz tili va matematika fanini yaxshi biladigan yoshlar;
Nomzodlar tanlov asosida tanlab olinadi. Imtiyozlar kam ta'minlangan, yuqori ilmiy natijalarga ega, o‘zida yetakchilik qobiliyatlarini shakllantirgan, mintaqada biznesni rivojlantirishga qiziquvchi, ammo moliyaviy qiyinchiliklar sababli universitetda o‘qish uchun pul to‘lay olmaydigan yoshlarga beriladi.
2021 yilgi dastur mezonlari bo‘yicha batafsil ma'lumotni https://uscaef.org havolasi orqali olishingiz mumkin. Barcha abituriyentlar Markaziy Osiyodagi Amerika Universitetida (American University of Central Asia)ning kirish imtihonlarini mustaqil ravishda topshirishlari shart. Bu US-CAEF dasturidan boshqa alohida jarayon hisoblanadi. Faqatgina universitetga qabul qilinganlar US-CAEF finalchilari sifatida tanlanishi mumkin.
email: uscaef.uz@americancouncils.org
Facebook: AmericanCouncilsUzbekistan
Instagram: AmericanCouncils.Uz
Telegram: ACCELS
Reklama huquqi asosida
