Ижтимоий масъулият ҳар биримизнинг бурчимиз. Буни коронавирус инфекциясининг пандемияси яна бир бор ёдга солди. Ана шундай мураккаб даврда яшаш шароитини яхшилаш учун янги имкониятларни ишга солиш жуда зарур.

Метеорологларнинг фикрига кўра, бу йил қиш совуқ келиб, ҳаво ҳарорати олдинги йилларга нисбатан паст бўлиши кутилмоқда. Шу муносабат билан мамлакат аҳолисини иситиш мосламалари билан таъминлаш устувор вазифалардан саналади.

Фарғона нефтни қайта ишлаш заводи совуқ кунлар бошланиши билан, ишлаб чиқарилаётган печь ёқилғисининг нархини жорий йилнинг 20 ноябридан эътиборан пасайтиришга қарор қилди (илгари унинг нархи бир тонна учун 4,4 миллион сўмни ташкил қилар эди):

• Заводнинг ўзидан тоннаси учун 4 миллион сўмгача;
• Республикада жойлашган «Ўзбекнефтгаз» АЖ нефт омборларидан бир тонна учун 3 миллион 950 минг сўмгача. 

Ушбу чора-тадбирлар республика аҳолисини қўллаб-қувватлашга, шунингдек, автоном иситиш қозонларидан фойдаланиладиган ижтимоий соҳа объектлари эҳтиёжларини таъминлаш мақсадида белгиланди.

Фарғона нефтни қайта ишлаш заводи ахборот хизмати