O‘zbekiston Respublikasi Fanlar akademiyasi Milliy arxeologiya markazi Kun.uz saytida e'lon qilingan «Samarqanddan o‘g‘irlangan tarixiy koshinlar London aeroportida qo‘lga tushirildi» nomli maqolada keltirilgan jumlaga nisbatan raddiya bildirdi.

Markaz maqola ichidagi «Koshinlar O‘zFA Arxeologiya instituti, Samarqanddagi qo‘riqxona yoki muzeydan olib ketilgan bo‘lishi mumkin» deb nomlanuvchi kichik sarlavhaga e'tiroz bildirgan.

«O‘zR FA Milliy arxeologiya markazi shuni ma'lum qiladiki, bunday jiddiy xulosalar berish uchun hech qanday asos yo‘q. Milliy arxeologiya markazi mutaxassislari ham Britaniya muzeyi tomonidan ma'lum qilingan ushbu koshinlarni ilmiy o‘rganish va xulosalar berish uchun jalb qilingan. Dastlabki o‘rganish ishlari natijalariga ko‘ra, topilmalarning Shohi-Zinda majmuasidagi maqbaralarga tegishliligini tasdiqlovchi dalillar qayd etilmadi», – deyiladi markaz direktori F.Maqsudov imzosi bilan tahririyatga yo‘llangan xatda.