«Koronavirus kasalligi mutlaqo yangi kasallik bo‘lib, hali u haqida yetarli ma'lumotga ega emasmiz. Bu borada alohida ilmiy izlanishlar amalga oshirilmagan.

Qolaversa, kasallik yosh bolalarda juda yengil formada o‘tyapti, shuning uchun kelajakda biror-bir jiddiy asorat qoldirishi haqida bashorat qilish noto‘g‘ri bo‘ladi.

Fikrimizcha, Covid-19 kelajakda farzand ko‘rmaslik (bepushtlik) kabi holatlarni keltirib chiqaradigan kasalliklar sirasiga kirmaydi», dedi Nurmat Otabekov.

Shuningdek, surunkali qandli diabet kasalligi bo‘lgan bemorlar davolanish uchun qayerga murojaat qilishi kerakligi haqidagi savolga ham javob berildi.

«Dunyo miqyosida pandemiya boshlanganidan keyin respublikamizda ham karantin tufayli ko‘pgina shifoxonalar faoliyati (profili) o‘zgartirildi. Otangizni davolatish uchun yashash joyingiz bo‘yicha poliklinikaga murojaat qilsangiz, hozirda faoliyat ko‘rsatayotgan shifoxonalar to‘g‘risida aniq ma'lumot olishingiz mumkin.

Buning ustiga keyingi paytlarda profilini o‘zgartirgan muassasalar, birin-ketin qaytadan o‘zlarining avvalgi faoliyatini tiklamoqda», dedi shtab a'zosi.

Brifingda ma'lum qilinishicha, kon'yunktivit ham koronavirus kasalligi belgilaridan biri bo‘lishi mumkin.

«Tadqiqotchi olimlarning aniqlashicha, kon'yunktivit ya'ni ko‘z shilliq pardasining yallig‘lanishi koronavirus kasalligining belgilaridan biri bo‘lishi mumkin. Italiyalik olimlar koronavirus burun shilliq qavatida aniqlangandan bir hafta o‘tib ko‘z shilliq qavatida ham uchrashini tadqiqotlarida ta'kidlashgan. Shuning uchun koronavirus kasalligini davolayotgan shifokorlar nafaqat burun va og‘iz, balki ko‘zlarni ham himoya qilish borasida ham ogohlantiriladi.

Xitoy shifokorlarining tajribasida ham koronavirus bilan davolanayotgan bemorlarda 1 foiz holatda kon'yunktivit aniqlangan», dedi Nurmat Otabekov.