Covid-19 бепуштлик каби ҳолатларни келтириб чиқарадиган касалликлар сирасидан эмас – Отабеков

Жамият 15:14 / 15.09.2020 4287

«Коронавирус касаллиги мутлақо янги касаллик бўлиб, ҳали у ҳақида етарли маълумотга эга эмасмиз. Бу борада алоҳида илмий изланишлар амалга оширилмаган.

Қолаверса, касаллик ёш болаларда жуда енгил формада ўтяпти, шунинг учун келажакда бирор-бир жиддий асорат қолдириши ҳақида башорат қилиш нотўғри бўлади.

Фикримизча, Covid-19 келажакда фарзанд кўрмаслик (бепуштлик) каби ҳолатларни келтириб чиқарадиган касалликлар сирасига кирмайди», деди Нурмат Отабеков.

Шунингдек, сурункали қандли диабет касаллиги бўлган беморлар даволаниш учун қаерга мурожаат қилиши кераклиги ҳақидаги саволга ҳам жавоб берилди.

«Дунё миқёсида пандемия бошланганидан кейин республикамизда ҳам карантин туфайли кўпгина шифохоналар фаолияти (профили) ўзгартирилди. Отангизни даволатиш учун яшаш жойингиз бўйича поликлиникага мурожаат қилсангиз, ҳозирда фаолият кўрсатаётган шифохоналар тўғрисида аниқ маълумот олишингиз мумкин.

Бунинг устига кейинги пайтларда профилини ўзгартирган муассасалар, бирин-кетин қайтадан ўзларининг аввалги фаолиятини тикламоқда», деди штаб аъзоси.

Брифингда маълум қилинишича, конъюнктивит ҳам коронавирус касаллиги белгиларидан бири бўлиши мумкин.

«Тадқиқотчи олимларнинг аниқлашича, конъюнктивит яъни кўз шиллиқ пардасининг яллиғланиши коронавирус касаллигининг белгиларидан бири бўлиши мумкин. Италиялик олимлар коронавирус бурун шиллиқ қаватида аниқлангандан бир ҳафта ўтиб кўз шиллиқ қаватида ҳам учрашини тадқиқотларида таъкидлашган. Шунинг учун коронавирус касаллигини даволаётган шифокорлар нафақат бурун ва оғиз, балки кўзларни ҳам ҳимоя қилиш борасида ҳам огоҳлантирилади.

Хитой шифокорларининг тажрибасида ҳам коронавирус билан даволанаётган беморларда 1 фоиз ҳолатда конъюнктивит аниқланган», деди Нурмат Отабеков.

Кўпроқ янгиликлар