Kambag‘allikni qisqartirish va aholini ish bilan ta'minlashga oid yangi prezident qarori qabul qilindi.
Unga asosan, 2020 yilda aholining ijtimoiy ehtiyojmand toifalari, ayniqsa, nogironligi bo‘lgan shaxslarning ish bilan bandligini ta'minlash maqsadida tajriba tariqasida:
- ishga layoqatli nogironligi bo‘lgan shaxslarning elektron reyestri shakllantiriladi va reyestrga kiritilgan shaxslarga bo‘sh ish o‘rinlariga joylashishga ko‘maklashiladi;
- tadbirkorlik sub'yektlariga ish o‘rinlari va sharoitlarini nogironligi bo‘lgan shaxslarga moslashtirish uchun Bandlikka ko‘maklashish davlat jamg‘armasi mablag‘lari hisobidan har bir moslashtirilayotgan ish joyi uchun BHMning 40 baravarigacha miqdorda subsidiya ajratiladi;
- nogironligi bo‘lgan shaxslar uchun ish o‘rinlari yaratayotgan tadbirkorlik sub'yektlariga Bandlikka ko‘maklashish davlat jamg‘armasi mablag‘lari hisobidan tijorat banklari orqali har bir yaratilayotgan ish o‘rni uchun BHMning 25 baravarigacha, biroq jami har bir tadbirkorlik sub'yekti uchun BHMning 500 baravaridan oshmagan miqdorda 3 yil muddatga, bir yillik imtiyozli davr bilan Markaziy bankning asosiy stavkasida, yaratilgan ish o‘rnida nogironligi bo‘lgan shaxslarning kamida bir yil ishlashi sharti bilan mikrokreditlar ajratish tartibi joriy etiladi;
- Bandlik va mehnat munosabatlari vazirligi tizimidagi kasb-hunarga o‘qitish markazlarida ijtimoiy himoyaga muhtoj, ayniqsa, kam ta'minlangan va mehnat migrantlari oilalarining a'zolari, nogironligi bo‘lgan shaxslarni bepul o‘qitish kurslari tashkil etiladi.
Belgilanishicha, 2021 yil 1 fevralga qadar ushbu tajriba doirasida qilingan ishlar monitoring qilinadi. Tajribaning ijobiy yakunlari bo‘yicha uni keyinchalik doimiy asosda joriy etish yuzasidan hukumatga asoslantirilgan takliflar kiritiladi.
