Вазир ўринбосари: «Темир дафтар»га кирган меҳнатга лаёқатли фуқаро иш билан таъминлангандан кейингина дафтардан чиқарилади

Жамият 18:00 / 31.07.2020 6568

Бугун, 31 июль куни тегишли вазирлик мутасаддилари иштирокида  президентнинг коронавирус пандемияси даврида ижтимоий ҳимояга ва ёрдамга муҳтож аҳоли қатламларини моддий қўллаб-қувватлашга доир фармони ижросига бағишланган онлайн матбуот анжумани ўтказилди.

Унда Иқтисодий тараққиёт ва камбағалликни қисқартириш вазирининг биринчи ўринбосари Акмалхон Ортиқов эҳтиёжманд оила сифатида рўйхатга олинган («темир дафтар») ва ишга лаёқатли фуқароларнинг бу рўйхатдан қайси ҳолатда чиқарилишига ҳам аниқлик киритди.

«Биз ҳозир бу рўйхатга кирган фуқароларни озиқ-овқат, дори-дармон ёки моддий таъминот билан таъминлаяпмиз.

Эътиборли томони «темир дафтар»га киритилган 400 мингдан ортиқ оилада яшайдиган 1,7 млн аҳолининг ҳар бирига 1 ойга етадиган 14 турдаги озиқ овқат маҳсулотларидан келиб чиқиб, бир кишига 220 минг сўмдан, 4-5 кишилик оилага эса 1 млн 100 минг сўмдан нақд пул шаклида моддий ёрдам кўрсатиладиган бўлди.

Шу йилнинг 15 августига қадар бу ёрдамлар эгаларига етиб боришини таъминлаймиз.

Бизнинг кейинги ягона йўлимиз бу рўйхатдаги меҳнатга лаёқатли фуқароларни бандлигини таъминлаш, уларга иш топиб бериш бўлади. Уларни доимий даромадли фаолиятга йўналтиришимиз керак. Шундан кейингина бу фуқаролар рўйхатдан чиқарилади. Бу ёрдамни олди дегани «темир дафтар»дан чиқиб кетди дегани эмас» – дея Ортиқовнинг сўзларини келтирмоқда Kun.uz мухбири.

Вазир ўринбосарининг сўзларидан кейин унга рўйхатдаги ишга яроқли фуқаролар қанчани ташкил этади ва уларни тўлиқ ҳамда қониқтирадиган маблағга эга иш билан таъминлаш ваъдангиз қанчалик реал, мазмунида савол берилди.

Вазир ўринбосарига кўра, ушбу рўйхатни шакллантириш давомида мутасадди вазирликлар унга кирган меҳнатга лаёқатли фуқароларни ҳам аниқлаб олган.

«Тўғри, буларнинг ҳаммаси давлат ёки хўжалик юритувчи ташкилотларда иш билан таъминланади дегани эмас. Охирги вақтда эътибор бераётган бўлсангиз, ҳар бир ишимиз моддий таъминоти орқали қилинмоқда. Масалан, оилавий тадбиркорлик очиш ҳисобига ўзини-ўзи банд қилган фуқаролар учун жорий йилда 5 трлн.дан ортиқ маблағ ажратиш кўзда тутилган.

Бундан ташқари, хизматлар кўрсатиш дастури орқали фуқаролар бандлигини таъминлаш. Бунга ҳам 1 трлн.га яқин маблағ ажратилмоқда. Бунга ҳам шундай шаффоф меҳнизм қилиндики, фуқаро солиқ идораларининг махсус дастури орқали рўйхатдан ўтса, унинг бандлиги ҳисобга олинади. Шунингдек, у белгиланган маълум тўловларини тўлаб борса, йиллик меҳнат стажига ҳам эга бўлади.

Бундан ташқари, ҳудудлардаги раҳбарлар амалга оширилаётган инвестицион лойиҳаларга айнан мана шу рўйхатдаги фуқароларни жалб қилишни ҳам ташкил этади», – Акмалхон Ортиқов.

Кўпроқ янгиликлар