Oxirgi birja savdolari ma'lumotlariga ko‘ra, Apple aksiyalari narxi 6,51 foizga oshib, bir donasi uchun 409,81 dollarga yetgan. Bu narxdan kelib chiqilsa, kompaniya kapitallashuvi 1,77 trln dollarni tashkil qilmoqda. Saudi Aramco’ning ayni vaqtdagi kapitallashuvi esa taxminan 1,76 trln dollarni tashkil qilmoqda. 

Saudiya Arabistoni kompaniyasi 2019 yil dekabrda IPO o‘tkazgandan keyin deyarli 2 trln dollarga baholanayotgandi. O‘shanda Apple’ning bozor narxi 1,2 trln dollarga baholangan. Buning natijasida Saudi Aramco dunyoning eng qimmat kompaniyasiga aylanib, Apple’ni 2-o‘ringa tushirib yuborgandi. 31 iyulda esa AQSh kompaniyasi kapitallashuvi bo‘yicha birinchi marta arab kompaniyasidan o‘zib ketdi.

31 iyulga o‘tar kechasi Apple boshqa bir qator texnologik kompaniyalar bilan birga 2019-2020 moliyaviy yilning 3-choragi bo‘yicha moliyaviy hisobotni taqdim qildi. Unga ko‘ra, kompaniyaning aprel-iyundagi sof daromadi 2019 yilning shu davridagiga nisbatan 18 foizga oshib, 16,3 mlrd dollarga yetgan, tushumi esa 11 foizga oshib, 59,7 mlrd dollarni tashkil qilgan.

Apple 1976 yilda tashkil etilgan bo‘lib, planshetlar, kompyuterlar, audiopleyerlar, telefonlar, “aqlli” soatlar va dasturiy ta'minot ishlab chiqarish bilan shug‘ullanadi.

Saudi Aramco Saudiya Arabistonining milliy neft kompaniyasi bo‘lib, 1933 yilda tashkil etilgan. Kompaniya podshohlikdagi deyarli butun neft sohasini nazorat qiladi.